સામે કતરાઈને શું જોવે છે..? ખાણીપીણીની રેંકડીએ માથાભારે શખ્સ અને તેના ત્રણ સાગરીતોની બબાલ : યુવાન પર હુમલો

Image : Freepik

Jamnagar Crime : જામનગર શહેરના સાધના કોલોનીમાં ઈંડાની રેંકડીએ ઉભેલા યુવાનને 'સામે કતરાઈને શું જોવે છે' તેમ કહીને 4 શખસોએ હુમલો કરી છરી બતાવીને ધમકી આપ્યાની પોલીસ ફરિયાદ નોંધાવાઈ છે.

શહેરના સાધના કોલોનીમાં રહેતો ભાણજી રવજીભાઈ સીંગરખીયા (ઉ.વ.25) નામનો યુવાન ગત તા.16ની રાત્રીના સાધના કોલોનીના પહેલા ગેઈટ સામે ઈંડાની રેકડીએ પાર્સલ લેવા માટે ઉભો હતો. ત્યારે નામચીન આરોપી હર્ષ ઉર્ફે ટકો અને ત્રણ અજાણ્યા શખસો બાઈક લઈને આવ્યા હતા. જ્યાં હર્ષે કહયું હતું કે તું સામે હજી કતરાઈને શું જોવે છે..? તેમ કહીને અપશબ્દો બોલીને ઢીકાપાટુનો માર મારવા લાગ્યા હતા. 

આ સમયે ઈંડાના રેંકડીવાળા રાઈલાભાઈ આવી જતાં યુવાનને છોડાવ્યો હતો. દરમ્યાન છરી બતાવીને જાનથી મારી નાખવાની ધમકી આપીને ચારેય શખ્સો બાઈક લઈને નાશી છુટ્યા હતા. જે અંગેની યુવાને પોલીસમાં ફરિયાદ નોંધાવતાં પોલીસે તપાસ હાથ ધરીને આરોપીની શોધખોળ આરંભી છે.