જામજોધપુર નજીક કારમાં લઈ જવાતો ઇંગ્લિશ દારૂ પકડાયો , 9.60 લાખની માલમતા સાથે એકની અટકાયત, છ ફરાર

Jamnagar Liquor Crime : જામનગર જિલ્લાના જામજોધપુર પંથકમાં સત્તાપર ગામ પાસેથી એક કારમાં લઈ જવાતો ઇંગ્લિશ દારૂનો માતબર જથ્થો પોલીસે પકડી પાડ્યો છે, અને ઇંગ્લિશ દારૂ તેમજ કાર સહિત રૂપિયા 9.60 લાખની માલમતા કબજે કરી લઈ એક આરોપીની અટકાયત કરી છે, જ્યારે અન્ય છ આરોપીઓને ફરાર જાહેર કરાયા છે.

 જામજોધપુરના પોલીસ સ્ટાફ દ્વારા ગઈકાલે રાતે જામજોધપુરના સત્તાપર ગામ પાસે પેટ્રોલિંગ કરવામાં આવી રહ્યું હતું, જે દરમિયાન મૂળ ભાણવડના રાણપરના વતની અને રિક્ષા ડ્રાઇવિંગ કરતો બાવનભાઈ માંડાભાઈ કોડીયાતર કે જે એક કાર લઈને શંકાસ્પદ હાલતમાં નીકળતાં પોલીસે તેની અટકાયત કરી હતી. જે તલાશી દરમિયાન કારમાંથી 395 નંગ મોટી બોટલ મળી આવી હતા. તેથી પોલીસે કાર અને રૂપિયા 9 લાખ 60 હજારની માલમતા કબજે કરી લીધી હતી, અને રાણપર ગામના બાવનભાઈ કોડિયાતરની અટકાયત કરી લીધી હતી.

 ઉપરોક્ત દારૂની હેરાફેરી કરવામાં તેમજ સપ્લાય કરવામાં અન્ય છ વ્યક્તિના નામો ખુલ્યા હતા, જે પૈકીના ઘેલુભાઈ જગાભાઈ કોડીયાતર, જગાભાઈ દાનાભાઈ શામળા, ભોજાભાઇ જેસાભાઇ રબારી, સાગર બાવનજી, ખેમાભાઈ કોડીયાતર અને અમરાભાઇ જગમાલભાઈ સહિતના અન્ય આરોપીઓને ફરાર જાહેર કરાયા છે.