મુન્દ્રા પોર્ટ પરથી ઝડપાયા 100 કરોડના પ્રતિબંધિત તરબૂચના બીજ, શિપમેન્ટની ખોટી તારીખ દર્શાવી આચરાયું કૌભાંડ

DRI Seized Banned 100 Crore Watermelon Seeds at Mundra Port: કચ્છના મુન્દ્રામાં ડિરેક્ટોરેટ ઑફ રેવન્યુ ઇન્ટેલિજન્સે (DRI) સુદાનથી આવેલા તરબૂચના પ્રતિબંધિત બીજનો મોટો જથ્થો ઝડપી પાડ્યો છે. આ બીજનું મૂલ્ય રૂ. 100 કરોડ જેટલું થવા જાય છે, જે 200 કન્ટેઇનરમાં ભારત સુધી આવ્યા છે. આશ્ચર્યની વાત એ છે કે, આ પ્રકારના બીજ પર પ્રતિબંધ હોવા છતાં ખોટા બિલ સાથે તે મુંદ્રા બંદરે આયાત કરવામાં આવ્યા હતા. પ્રાથમિક અહેવાલો પ્રમાણે, આ સમગ્ર કૌભાંડમાં કુલ 17 આયાતકારો છે, જેમાં આશરે રૂ. 40 કરોડની કરચોરી ઝડપાઈ છે.

શું છે પ્રતિબંધિત બીજ? 

DRIની ગાંધીધામ શાખા દ્વારા આ કાર્યવાહી કરવામાં આવી છે. બાતમીના આધારે DRIની ગાંધીધામ યુનિટને જાણવા મળ્યું કે, આયાતકારો પાંચમી એપ્રિલ 2024ના રોજ ડીજીએફટીના જાહેરનામું નંબર 05/2023ની જોગવાઈઓનો દુરુપયોગ કરવાનો પ્રયાસ કરી રહ્યા હતા. જેમાં પહેલી મે 2024થી 30 જૂન 2024 સુધી તરબૂચના બીજની મફત આયાત કરવાની મંજૂરી આપવામાં આવી હતી. જાહેરનામામાં 30 જૂન 2024 સુધી રજૂ કરાયેલા બિલ સાથેના શિપમેન્ટને મફત આયાત તરીકે મંજૂરી આપવામાં આવી હતી, પરંતુ તે તારીખ પછી મોકલવામાં આવેલી કોઈપણ આયાતને 'પ્રતિબંધિત' તરીકે વર્ગીકૃત કરાયું હતું. 

આ પણ વાંચોઃ નકલીની ભરમારઃ મોરબીમાંથી ડુપ્લીકેટ એન્જીન ઓઇલનો થયો પર્દાફાશ, 23 લાખના મુદ્દામાલ સાથે બે આરોપી પકડાયા

આ રીતે થયો પર્દાફાશ

DRI તપાસમાં બહાર આવ્યું કે, આયાતકારોએ 30 જૂન 2024 પહેલાંની શિપમેન્ટની તારીખ દર્શાવીને કસ્ટમ્સમાં લેંન્ડિંગના નકલી બિલ સબમિટ કરીને સૂચનાનું ઉલ્લંઘન કર્યું હતું. જોકે, તપાસ દરમિયાન લેન્ડિંગના અસલ બિલના ટ્રેકિંગ અને વસૂલાત દ્વારા વાસ્તવિક શિપમેન્ટ તારીખોનો પર્દાફાશ કરવામાં આવ્યો હતો, જે 30 જૂન પછીની હતી.

આ પણ વાંચોઃ વડોદરા કોર્પોરેશનની ટીમ કલરવાળા મુખવાસનું ચેકિંગ કરવા ગઈ અને 700 કિલો શંકાસ્પદ મરચાનો જથ્થો મળી આવ્યો

જપ્ત કરવામાં આવેલા માલસામાનની કિંમત 100 કરોડ રૂપિયા છે અને ડ્યુટીના સમાવેશ સાથે કરચોરીની કુલ અંદાજિત કિંમત 39.65 કરોડ રૂપિયા થાય છે. તમામ આયાતી માલ જપ્ત કરવામાં આવ્યો છે અને સંડોવાયેલા લોકોની ઓળખ કરવા તેમજ યોગ્ય કાયદેસરની કાર્યવાહી કરવા માટે વધુ તપાસ હાથ ધરવામાં આવી છે.