રાજકોટની પાયલ સહિત દેશની અનેક હોસ્પિટલો, મોલમાંની મહિલાઓના CCTV હેક કરી ફૂટેજ વેચવાનો ગંદો ધંધો

Payal Maternity hospital Rajkot CCTV hacking Case: મેટરનીટી હોસ્પિટલોમાં પ્રસૂતાઓની સારવાર અને તપાસના વીડિયો યુ-ટયુબ અને ટેલીગ્રામ ચેનલો ઉપર અપલોડ કરીને કમાણીનો દેશવ્યાપી ગંદા ધંધાનો પર્દાફાશ કરી અમદાવાદ ક્રાઈમ બ્રાન્ચ અને સાયબર ક્રાઈમ બ્રાન્ચે મહારાષ્ટ્ર અને યુ.પી.ના ત્રણ સુત્રધારને પકડી પાડયા છે. ચોંકાવનારી બાબત એ છે કે, રાજકોટ સહિત દેશની અનેક હોસ્પિટલો અને મોલના સીસીટીવી વાઈફાઈ હેક કરીને મહિલાઓના સીસીટીવી ફૂટેજ મેળવી લઈને યુ ટ્યૂબ કે ટેલીગ્રામ ઉપર વેચાણ માટે મુકવામાં આવતા હતા. 

અમુક વીડિયો રાજકોટના રૈયા સર્કલ પાસે આવેલી પાયલ મેટરનીટી હોમના હોવાનો ખુલાસો થયા બાદ અમદાવાદ પોલીસે મહારાષ્ટ્રના લાતુરથી પકડેલો પ્રજવલ તૈલી, સાંગલીનો પ્રજ પાટીલ અને યુ.પી.ના પ્રયાગરાજનો રહીશ ચંદ્રપ્રકાશ ફુલચંદ યુ-ટ્યૂબ ચેનલ અને ટેલીગ્રામ ગ્રુપ્સ બનાવીને મહિલાઓના બિભત્સ સીસીટીવી ફૂટેજ વીડિયો રૂ. 800થી 4000 રૂપિયામાં વેચતા હતા. યુઝર આઈડી, પાસવર્ડ આપીને માનસિક વિકૃતિ સંતોષવાના નામે કરોડોની કમાણીનું નેટવર્ક ચલાવતા હતા.  સીસીટીવી હેક  કરવામાં આરોપીઓને એટલાન્ટા અને રોમાનિયાના હેકર્સની મદદ મળતી હોવાની વિગતો પણ ખૂલી છે.

સીસીટીવી સર્વર હેક કરીને રૂ. 800 થી 4000 વસૂલીને વિકૃતોને પૂરા પાડતાં  મહારાષ્ટ્ર- યુ.પી.ના ત્રણ સૂત્રધાર પકડાયા

યુ ટ્યુબ અને ટેલીગ્રામ ચેનલ પર રાજકોટની પાયલ મેટરનીટી હોસ્પિટલના વિવિધ વિભાગોના સીસીટીવી ફુટેજના વિડીયો  વાયરલ થવાના મામલે અમદાવાદ સાયબર ક્રાઇમ અને ક્રાઇમબ્રાંચની ટીમને આરોપીઓને ઝડપી લેવામાં મહત્વની સફળતા મળી છે.   ક્રાઇમબ્રાંચના જેસીપી શરદ સિંઘલે જણાવ્યું કે રાજકોટના સીસીટીવી ફુટેજના આઇપી એડ્રેસની તેમજ છેલ્લાં ત્રણ મહિનાની વિગતો એકત્ર કરવાની સાથે યુ ટ્યુબની ચેનલ અને ટેલીગ્રામની ચેનલના ટેકનીકલ એનાલીસીસ કરીને તપાસ કરવામાં આવતા પ્રજવલ અશોક તૈલી  (લાતુર), પ્રજ રાજેન્દ્ર પાટીલ (સાંગલી) અને ચંદ્ર પ્રકાશ ફુલચંદ (પ્રયાગરાજ) નામના વ્યક્તિઓની કડી મળી હતી. 

જેમા આધારે ક્રાઇમબ્રાંચની પાંચ જેટલી અલગ અલગ ટીમ બનાવીને તમામને ઝડપી લેવામાં આવ્યા હતા. તેમની પાસેથી પોલીસે હાર્ડ ડીસ્ક, મોબાઇલ ફોન, બેંક એકાઉન્ટ, લેપટોપ, કોમ્પ્યુટર સહિતનો મુદ્દામાલ પણ જપ્ત કરાયો છે.  આ તમામ આરોપીઓને લઇને પોલીસની ટીમ ગુરૂવારે બપોરે અમદાવાદ આવી પહોચશે. ત્યારે રિમાન્ડ માટે રજૂ કરી સમગ્ર મામલે તપાસ શરૂ કરાશે.

બીજી તરફ આરોપીઓ ઝડપાયા બાદ પોલીસ દ્વારા કરવામાં આવેલી પ્રાથમિક તપાસમાં જાણવા મળ્યું છે કે  પ્રજવલ તૈલી સમગ્ર કૌભાંડનો માસ્ટર માઇન્ડ છે. તે રોમાનીયા અને એટલાન્ટા હેકર્સની મદદ લઇને દેશની વિવિધ હોસ્પિટલો, શોપીંગ મોલ તેમજ અન્ય જાહેર સ્થળોના સીસીટીવી હેક કરતો હતો અને તેના ફુટેજ ડાઉન લોડ કરતો હતો. જ્યારે સાંગલીમાં રહેતો પ્રજ ટેલીગ્રામ ચેનલ પરના મેમ્બરને સીસીટીવી ફુટેજના વિડીયો રૂપિયા 800થી માંડીને ચાર હજાર રૂપિયા સુધીમાં વેચાણ કરતો હતો. તેમજ  ચંદ્ર પ્રકાશ યુ ટ્યુબ ચેનલ પર આ ફુટેજ અપલોડ કરીને ટેલીગ્રામની લીંક પણ મુકતો હતો. જેના આઘારે ગ્રાહકો મળતા હતા. 

પ્રાથમિક તપાસમાં તેમણે રાજકોટ સહિત દેશના અન્ય શહેરોની હોસ્પિટલના સીસીટીવી હેક કરીને ખુબ મોટા પ્રમાણમાં વિડીયો બનાવ્યા હતા.ચોંકાવનારી બાબત એ છે કે, ત્રણેય આરોપી હેકર્સ દ્વારા હોસ્પિટલો, મોલ અને જાહેર જગ્યાના સીસીટીવી કેમેરા હેક કરી મહિલાઓના ફૂટેજ મેળવી લઈને માનસિક વિકૃતોને ટેલીગ્રામ કે યુ ટ્યૂબ ઉપર યુઝર આઈડી, પાસવર્ડ આપીને વેચાણનું આયોજનપૂર્વકનું આંતરરાષ્ટ્રીય નેટવર્ક ચલાવતા હોવાનો ઘટસ્ફોટ થયો છે.

ક્રાઇમબ્રાંચ અને સાયબર ક્રાઇમની ટીમે 48 કલાક જાગીને ઓપરેશન પાર પાડ્યું

રાજકોટની હોસ્પિટલના સીસીટીવી હેક કરીને વાયરલ કરવાના મામલે ગુનો નોંધવાની સાથે જ ક્રાઇમબ્રાંચના જેસીપી શરદ સિંઘલે સાયબર ક્રાઇમના ડીસીપી લવીના સિન્હા , ક્રાઇમબ્રાંચના ડીસીપી અજીત રાજયન,  સાયબર ક્રાઇમના એસીપી  હાર્દિક માકડિયા અને ક્રાઇમબ્રાંચના એસીપી ભરત પટેલને અલગ અલગ ટાસ્ક આપીને પાંચ જેટલા પીઆઇની ટીમ બનાવીને મહારાષ્ટ્ર અને પ્રયાગરાજ મોકલી હતી.અને સતત 48 કલાક સુધી કો-ઓર્ડીનેટ કરીને સમગ્ર કૌભાંડને પાર પાડ્યું હતું.

રાજકોટની પાયલ હોસ્પિટલના સીસીટીવી જાન્યુઆરીના પહેલા વીકમાં હેક કરાયા હતા

રાજકોટની પાયલ મેટરનીટી હોસ્પિટવના સીસીટીવી હેક કરવાના મામલે આરોપીઓની પુછપરછ કરવામાં આવી ત્યારે જાણવા મળ્યું હતુ કે ડિસેમ્બર 2024ના છેલ્લા સપ્તાહથી હોસ્પિટલના આઇપી એડ્રેસને આધારે હેક કરવાના સોફ્‌ટવેરની મદદથી કામ શરૂ કરાયું હતું. જેમાં જાન્યુઆરી મહિના પ્રથમ સપ્તાહમાં એટલે કે 10 દિવસમાં આરોપીઓને સીસીટીવીની ડાયરેક્ટ લીંક મળી ગઇ હતી. જેના આધારે તે ફુટેજને ડાઉનલોડ કરીને એડીટ કરવાની સાથે અનએડિટ ભાગ પણ રાખતા હતા. જે ડિમાન્ડના આધારે ભાવ નક્કી કરીને વેચાણ કરતા હતા.

ટેલીગ્રામની અનેક ચેનલની મદદથી કરોડો રૂપિયાની કમાણી

આરોપીઓ માટે વિડીયો ફુટેજ વેચાણ માટે ટેલીગ્રામની ચેનલ મુખ્ય સ્ત્રોત હતુ. જેના દ્વારા પ્રજ પાટીલે ઓનલાઇન નાણાં મેળવીને પ્રજવલને આપ્યા હતા. છેલ્લાં એક વર્ષમાં કરોડો રૂપિયા એકઠા કર્યાની વિગતો પણ પોલીસને મળી છે. જેમાં કેટલોક હિસ્સો વિદેશી હેકર્સને પણ અપાયો હતો.