હરિયાણાથી બીયરનો જથ્થો ભરીને મોરબી જતું કન્ટેનર એક્સપ્રેસ હાઈવે પર ઝડપાયું, બે શખ્સોની ધરપકડ

Vadodara Liquor Smuggling : હરિયાણાથી મોરબી ખાતે બીયરનો મોટો જથ્થો લઈને જતાં એક કન્ટેનરને વડોદરા અમદાવાદ એક્સપ્રેસ હાઈવેના ટોલનાકા પરથી જિલ્લા પોલીસની એલસીબી બ્રાન્ચે ઝડપી પાડી બે શખ્સોની ધરપકડ કરી હતી. 

આ અંગેની વિગત એવી છે કે જિલ્લા પોલીસનો સ્ટાફ ગઈ રાત્રે પેટ્રોલિંગમાં હતો ત્યારે બાતમી મળી હતી કે રાજસ્થાન પસિંગનું એક કન્ટેનર ગોધરાથી વડોદરા થઈ અમદાવાદ તરફ જનાર છે અને તેમા દારૂ અને બીયરનો જથ્થો ભરેલો છે. આ બાતમીના આધારે વડોદરા અમદાવાદ એક્સપ્રેસ હાઈવેના આસોજ ખાતે આવેલા ટોલનાકા પાસે ગઈ રાત્રે વોચ ગોઠવવામાં આવી હતી. દરમ્યાન બાતમી મુજબનું કન્ટેનર આવતા તેને રોકી તપાસ હાથ ધરવામાં આવી હતી. 

કન્ટેનરના ચાલક સુનીલસિંગ કમલસિંહ ભક્તરામસિંગ રહે ઈમસોર જીલ્લો રાજૌરી જમ્મુ કાશ્મીર અને ક્લીનર કાદરખાન રહીમબક્સ ચૌહાણ રહે મહંમદપુર જીલ્લો નુહું હરિયાણાની અટકાયત કરી પોલીસે બંનેની પૂછપરછ કરતા ગલ્લા તલ્લા કર્યા હતા. બાદમાં પોલીસે કન્ટેનર ખોલી તપાસ હાથ ધરી હતી જેમાં પ્લાસ્ટિક પાવડર ભરેલ પ્લાસ્ટિકની 280 જેટલી થેલીઓની નીચે બિયરનો મોટો જથ્થો સંતાડ્યો હોવાનું જણાયું હતું. પોલીસે બિયરની 12,264 નંગ બોટલ અને ટીન, મોબાઈલ, કન્ટેનર મળી કુલ 30 લાખનો મુદ્દામાલ કબજે કર્યો હતો. ડ્રાઇવર અને ક્લીનરની પૂછપરછ કરતા બંનેએ જણાવ્યું હતું કે તોફીકખાન રહીમબકરા ચૌહાને નુંહુ હોડલ રોડ ઉપર સરપંચ ધાબા પર એક ગાડી ઉભી છે અને આ ગાડી લઈને ગુજરાતના મોરબી ખાતે પહોંચી ફોન કરવા જણાવેલ. બાદમાં અમે આ ગાડી લઈને મોરબી તરફ જતા હતા આ અંગે મંજુસર પોલીસે ગુનો નોંધી વધુ તપાસ હાથ ધરી છે.