રઝળતા પશુ સાથે બાઈક અથડાતા બાઈકચાલક મજૂરનું મોત, ચેલા ગામ પાસેની ઘટના

Accident Incident In Jamnagar : જામનગર-લાલપુર ધોરી માર્ગ પર ચેલા ગામના પાટીયા પાસે બાઈક લઈને જઈ રહેલા એક શખસ રસ્તે રઝળતા પશુ સાથે અથડાતા અકસ્માત સર્જાયો હતો. અકસ્માતની ઘટનામાં બાઈક ચાલકને ગંભીર ઈજા પહોંચતા મોત નીપજ્યું હતું. આ મામલે પંચકોશી બી. ડિવિઝન પોલીસ અકસ્માતનો ગુનો નોંધી તપાસ હાથ ધરી.

રખડતા ઢોર સાથે બાઈક અથડાતા એક વ્યક્તિનું મોત

મળતી માહિતી પ્રમાણે, જામનગર નજીક ઢેબા ચોકડી પાસે રહેતા જીવણભાઈ ખેતાભાઇ ચૌહાણ (ઉં.વ.51) કડિયા કરીને પરિવારનું ગુજરાન ચલાવે છે. ગઈકાલે શનિવારે જીવણભાઈ પોતાનું બાઈક લઈને ચેલા રોડ પરથી પસાર થઈ રહ્યા હતા, આ દરમિયાન માર્ગમાં રઝળતા ઢોર સાથે તેમનું બાઈક ટકરાયું હતું. સમગ્ર ઘટનામાં બાઈક ફંગોળાઈ જતા જીવણભાઈને ગંભીર ઈજા થઈ હતી. ઘટનાની જાણ સ્થાનિકોને થતાં 108 જાણ કરતા એમ્બ્યુલન્સ ઘટનાસ્થળે પહોંચી હતી. 

આ પણ વાંચો : VIDEO: રાજ્યમાં બેફામ ડમ્પરોનો આતંક: મોરબીમાં એક બાળકનું મોત, સુરતમાં વિદ્યાર્થી ગંભીર

અકસ્માતમાં જીવણભાઈને ગંભીર ઈજા પહોંચતા તેમનું મોત નીપજ્યું હતું. ઘટના અંગે મૃતકના પુત્ર ગૌતમ જીવણભાઈ ચૌહાણે પોલીસને જાણ કરતાં પંચકોશી બી. ડિવિઝનનો પોલીસ સ્ટાફે ઘટનાસ્થળે પહોંચી, મૃતદેહનો કબજોને લઈને વધુ તપાસ હાથ ધરી.