જામનગરના લાલપુર નજીક ટ્રક હડફેટે ચગદાઈ જવાથી અજાણ્યા યુવાનનું અંતરિયાળ અપમૃત્યુ

Jamnagar Accident : જામનગર જિલ્લાના લાલપુર તાલુકાના મોટી ખાવડી નજીક એક ટ્રકના ચાલકે 40 થી 45 વર્ષની વયના અજાણ્યા યુવકને કચડી નાખતાં ગંભીર ઇજા થવાથી ઘટના સ્થળેજ કરુણ મૃત્યુ નીપજ્યું છે. જે મામલે મેઘપર પોલીસ તપાસ ચલાવે છે.

આ અકસ્માતના બનાવની વિગત એવી છે કે જામનગર-ખંભાળિયા ધોરી માર્ગ પર મોટી ખાવડી ગામના પાટીયા પાસે ગઈકાલે બપોરે 12.00 વાગ્યાના અરસામાં પૂરઝડપે આવી રહેલા જીજે-12 બી.એફ. 9378નંબરના ટ્રકના ચાલકે પોતાનું વાહન બેદરકારી પૂર્વક ચલાવી પગપાળા ચાલીને જઈ રહેલા 40 થી 45 વર્ષની વયના એક આજ્ઞાત યુવાનને હડફેટમાં લઈ કચડી નાખતાં તેનું ઘટના સ્થળે જ કમકમાટી ભર્યું મૃત્યુ નીપજ્યું હતું. 

આ બનાવ અંગે મોટી ખાવડીના સામાજિક કાર્યકર વિપુલસિંહ હાલુભા જાડેજાએ પોલીસને જાણ કરતાં મેઘપર પોલીસે બનાવના સ્થળે પહોંચી જઈ અજ્ઞાત યુવાનના મૃત્તદેહનો કબજો સંભાળ્યો છે, અને પોસ્ટ મોર્ટમ કરાવ્યું છે. જયારે મૃતદેહની ઓળખ કરવા માટે જી.જી. હોસ્પિટલના કોલ્ડ રૂમમાં રાખ્યો છે. ઉપરાંત અકસ્માત સર્જનાર ટ્રક ચાલક સામે ગુનો નોંધ્યો છે.