અટલાદરામાં મોપેડ પર ગાંજો વેચતો આરોપી ઝડપાયો

 વડોદરા,અટલાદરા વિસ્તારમાં છેલ્લા બે મહિનાથી ગાંજો વેચતા બે આરોપીઓને અટલાદરા પોલીસે ઝડપી પાડયા છે. પોલીસે મધ્યપ્રદેશના ગાંજાના વેપારીની શોધખોળ શરૃ કરી છે.

અટલાદરા પોલીસ સ્ટેશનનો સ્ટાફ વિસ્તારમાં પેટ્રોલિંગમાં હતો. તે સમયે ડ્રગ્સની માહિતી મળી હતી કે, અટલાદરા વી.એમ.સી. હાઉસિંગના મકાનના આગળના ભાગે રોડ પર કૃણાલ કામ્બલેનો મિત્ર હેતરાજ બારિયા (રહે.  પાર્વતી નગર, જૂના  પાદરા રોડ) ગાંજાનું વેચાણ કરે છે. જે અંગે પી.આઇ. એમ.કે.ગુર્જરની સૂચના મુજબ, પોલીસ જવાન અલયભાઇ તથા અન્યએ પંચોને સાથે રાખી પોલીસ સ્ટાફે ઉપરોક્ત સ્થળે જઇને તપાસ કરતા કૃણાલ ગણપતિભાઇ કામ્બલે તથા હેતરાજ કલ્યાણસિંહ બારિયા મળી આવ્યા હતા. પોલીસે તેઓની પાસેથી બે કિલો ગાંજો કિંમત રૃપિયા ૨૦ હજારનો કબજે કર્યો હતો. પોલીસે તેઓની પૂછપરછ  કરતા જણાવ્યું હતું કે, છેલ્લા બે મહિનાથી ગાંજાનો ધંધો કરીએ છીએ. ગાંજાનો જથ્થો મધ્યપ્રદેશથી લાવું છું. પોલીસે મોેપડ, મોબાઇલ,રોકડા રૃપિયા મળીને કુલ રૃપિયા ૬૩,૨૩૦ નો મુદ્દામાલ કબજે કર્યો છે.