જામનગર-ખંભાળિયા ધોરીમાર્ગ પર ટ્રક તેમજ ટ્રેલર વચ્ચે અકસ્માત : આઠ લોકો ઇજાગ્રસ્ત થયા

Jamnagar Accident : જામનગર-ખંભાળિયા ધોરીમાર્ગ પર આવેલા મોટી ખાવડી પાસે સર્જાયેલા ગંભીર અકસ્માતમાં આઠ લોકો ઘાયલ થયા છે. મળતી માહિતી મુજબ, એક ટ્રક અને એક ટ્રેલર સામસામે અથડાયા હતા. આ અકસ્માત કેવી રીતે સર્જાયો તે અંગે હજુ સુધી સ્પષ્ટ માહિતી મળી શકી નથી. જોકે, અકસ્માત એટલો ગંભીર હતો કે બંને વાહનોને ભારે નુકસાન થયું હતું. 

ઘટનાની જાણ થતાં સ્થાનિક લોકો દોડી આવ્યા હતા અને 108 એમ્બ્યુલન્સને જાણ કરી હતી. ટૂંકીવારમાં જ 108 એમ્બ્યુલન્સ ઘટનાસ્થળે પહોંચી હતી, અને ઘાયલોને પ્રાથમિક સારવાર આપ્યા બાદ તાત્કાલિક જામનગરની સિવિલ હોસ્પિટલમાં ખસેડવામાં આવ્યા હતા. 

આ અકસ્માતને પગલે ધોરીમાર્ગ પર ટ્રાફિક જામની સ્થિતિ સર્જાઈ હતી. પોલીસે ઘટનાસ્થળે પહોંચીને ટ્રાફિકને વહેલી તકે પુનઃસ્થાપિત કરવાના પ્રયાસો કર્યા હતા. પોલીસે આ અકસ્માત અંગે ગુનો નોંધીને વધુ તપાસ હાથ ધરી છે.