રાજકોટમાં મંડળીના ચેરમેન દ્વારા યુવતી ઉપર અવાર-નવાર દૂષ્કર્મ

અરજીના આધારે ગાંધીગ્રામ પોલીસ મથકમાં ગુનો દાખલ  : જૂનાગઢ પંથકની યુવતીની જાણ બહાર તેની સાથે મૈત્રી કરાર કરી લીધાનો અને નોકરીમાંથી કઢાવી મુકયાનો આક્ષેપ

રાજકોટ, : જૂનાગઢ પંથકની યુવતીએ રાજકોટના રૈયા રોડ પરની વૈશાલીનગર સોસાયટીમાં આવેલ મેસન કલબ ક્રેડિટ કો-ઓપ. સોસાયટીના ચેરમેન પરાગ અનિલભાઈ સોલંકી વિરૂધ્ધ દૂષ્કર્મની ફરિયાદ નોંધાવી છે. જેના આધારે ગાંધીગ્રામ પોલીસે તપાસ હાથ ધરી છે. 

ભોગ બનનાર યુવતીએ નોંધાવેલી ફરિયાદમાં જણાવ્યું છે કે તેણે બીકોમ સુધી અભ્યાસ કર્યો છે. અગાઉ ખાનગી ઈન્શ્યોરન્સ કંપનીમાં નોકરી કરતી હતી. એક વખત ધાર્મિક પ્રસંગે રાજકોટમાં સંબંધીને ત્યાં આવી હતી ત્યારે પરિચીત મહિલાને નોકરીની વાત કરી હતી. જેથી તે મહિલાએ આરોપી પાસે વાત કરી હતી. પરિણામે આરોપીની ઓફિસમાં ઈન્ટરવ્યુ દેતાં આરોપીએ રૂા.૮ હજારનો પગાર નકકી કર્યો હતો. સાથો-સાથ 11 માસના કરાર પર લોન એકઝિકયુટીવ તરીકે નોકરી પર રાખી હતી. 

તે સાથે જ તે રાજકોટમાં પીજી તરીકે રહેવા આવી ગઈ હતી. તેને આરોપી જુદી-જુદી કામગીરી સોંપતો હતો. ધીરે-ધીરે આરોપીએ મિત્રતા કેળવી કહ્યું હતું કે તું ખુબ જ હોંશિયાર છો, મારે જુનાગઢમાં મંડળીની બીજી ઓફિસ ચાલુ કરવી છે, જેમાં તને 50  ટકા હિસ્સો આપીશ, તું મને ગમે છે, મારે તારી સાથે લગ્ન કરવા છે, મારે મારા પત્ની સાથે ઝઘડા ચાલે છે, તેને છૂટાછેડા આપી આપણે લગ્ન કરી લેશું. 

જોકે તેણે લગ્ન કરવાની ના પાડી હતી. એક દિવસ આરોપી મકાનમાં ભાડા કરારની જરૂર છે તેમ કહી કોઈ વકિલ-નોટરી પાસે લઈ ગયો હતો. જયાં તેની પાસે સહી કરાવી હતી. બાદમાં આરોપીએ તેને એવું કહ્યું હતું કે આપણે ભાડા કરાર નહીં પરંતુ મૈત્રી કરાર કર્યા છે. ત્યાર પછી આરોપી કાલાવડ રોડ ખાતે બેલવ્યુ રીસોર્ટ ફલેટમાં લઈ ગયો હતો. જયાં તેની મરજી વિરૂધ્ધ શારીરિક સંબંધ બાંધ્યો હતો. આરોપી તેનો બોસ હોવાથી નોકરીમાંથી કાઢી મુકશે તેવા ડરથી કોઈને આ બાબતે જાણ કરી ન હતી. આ પછી આરોપીએ તેને મંડળીમાં બેસાડી મંડળી સિવાયનું બીજું કામ પણ બતાવી વૈશાલીનગરમાં આવેલા તેના મકાનમાં લઈ જઈ ત્યાં પણ શારીરિક સંબંધ બાંધ્યો હતો. 

થોડા દિવસો બાદ તેને ખબર પડી હતી કે આરોપીની બીજી મંડળી મનીધારા સોસાયટી  150 ફુટ રીંગ રોડ પર કોર્પોરેટ લીમીટેડમાં આવેલી છે. જયાં પણ આરોપીએ એક યુવતીને પ્રેમજાળમાં ફસાવી તેની સાથે શારીરિક સંબંધ બાંધ્યા છે. આ વાત આરોપીને કરતાં ગુસ્સે થઈ તેને બદનામ કરી નાખવાની ધમકી આપી હતી. આખરે ર૦ર૩ના જાન્યુઆરી માસમાં તેણે નોકરીમાંથી રાજીનામું આપી દીધું હતું. 

બાદમાં પોતાના વતન જતી રહી હતી. બીજી નોકરી ન હોવાથી ફરીથી રાજકોટ આવી આરોપીના પર્સનલ કામ કરવાનું શરૂ કર્યું હતું. જે કામ ૬ મહિના તેણે કર્યું હતું. તે દરમિયાન પણ આરોપીએ અવાર-નવાર તેની મરજી વિરૂધ્ધ શારીરિક સંબંધ બાંધ્યો હતો. એટલું જ નહીં આરોપી અવાર-નવાર ધમકી આપતો હોવાથી કંટાળીને નવી નોકરી માટે અરજી કરી હતી. 

એક ઈન્શ્યોરન્સ કંપનીમાં નોકરી મળી જતાં આરોપીએ ત્યાના સિનિયર અધિકારીને કોલ કરી તેને નોકરીમાંથી કઢાવવાના પ્રયત્નો કર્યા હતા. જે બાબતે આરોપી વિરૂધ્ધ ગાંધીગ્રામ-ર પોલીસ મથકમાં અરજી કરી હતી. જેમાં આરોપીએ તેને ફોસલાવીને સમાધાન કરી લીધું હતું. નોકરીમાં તેણે આરોપીની મંડળીનું અનુભવનું સર્ટીફિકેટ રજૂ કર્યું હતું. આરોપીએ તેની કંપનીમાં પોતે આ સર્ટીફિકેટ નહીં આપ્યાનું કહી નોકરીમાંથી કઢાવી નાખી હતી. ત્યાર પછી આરોપીએ તેને કહ્યું કે તારે હું કહું એટલું જ કામ કરવાનું છે. જે બાબતે આરોપી સાથે ફોનમાં ઝઘડો થયા બાદ વાલીઓને આપવીતિ જણાવી આરોપી વિરૂધ્ધ પોલીસ કમિશનર કચેરીમાં અરજી કરી હતી. જેના આધારે પોલીસે ફરિયાદ નોંધી હતી.