ધંધુકા ન.પા. ચૂંટણીમાં 57.13 ટકા મતદાન, 60 ઉમેદવારનું ભાવિ ઈવીએમમાં સીલ થયું

- વહેલી સવારે અને સાંજના સમયે મતદારોનો વધુ ધસારો રહ્યો

- 8,861 પુરૂષ, 7,709 મહિલા સહિત કુલ 16,570 મતદારે કર્યો પોતાના મતાધિકારનો ઉપયોગ

 આ અંગેની પ્રાપ્ય વિગત અનુસાર ધંધુકા નગરપાલિકાની ૭ વોર્ડની ૨૮ બેઠકની સામાન્ય ચૂંટણી માટે આજે સવારે સાત વાગ્યાથી મતદાન શરૂ થયું હતું. જે સાંજે છ વાગ્યે શાંતિપૂર્ણ માહોલમાં પૂર્ણ થયું હતું. 

 ધંધુકાના કુલ ૭ વોર્ડમાટે નોંધાયેલ ૧૪,૭૩૩ પુરૂષ અને  ૧૪,૨૭૦ મહિલા સહિત કુલ ૨૯,૦૦૩ મતદાર હતા. જેમાંથી ૮,૮૬૧ પુરૂષ, ૭,૭૦૯ મહિલા સહિત કુલ ૧૬,૫૭૦ મતદારોએ પોતાના મતાધીકારનો ઉપયોગ કરતા ૫૭.૧૩ ટકા મતદાન નોંધાયું હતું. સૌથી વધુ મતદાન વોર્ડ નં.૭ માં ૬૪.૪૪ ટકા રહ્યંુ હતું તો સૌથી ઓછુ મતદાન વોર્ડ નં. ૬ માં ૪૭.૮૭ ટકા રહ્યું હતું.પાલિકાના ૭ વોર્ડની ૨૮ બેઠકો માટે ભાજપ, કોંગ્રેસ અને અપક્ષ મળી કુલ ૬૦ ઉમેદવારો ચૂંટણી જંગમાં છે. જેમનું ભાવિ આજે ઇવીએમમાં સીલ થયું હતું. 

 ચૂંટણી દરમિયાન સુરક્ષા વ્યવસ્થા માટે એક એએસપી, એક પીઆઈ, ત્રણ પીએસઆઈ સહિત ૬૫ પોલીસ કર્મચારીઓ અને ૪૪ હોમગાર્ડના જવાનો તેમજ ૨ એસ.આર.પી જવાનો તૈનાત કરાયા હતા. મતદાન પ્રક્રિયા માટે મુખ્ય ચૂંટણી અધિકારી સહિત ૨૨૯ કર્મચારીઓ, ૨૯ પ્રીસાઈડીંગ ઓફિસર, ૧૫૬ પોલીંગ સ્ટાફ તેમજ અન્ય ૩૯ કર્મચારીએ ફરજ બજાવી હતી. આરોગ્યકર્મીઓ દ્વારા વૃધ્ધોને વ્હીલચેર પર બેસાડીને મત કુટીર સુધી લઈ જઈને મતદાન કરાવવામાં આવ્યું હતુ.

વોર્ડ પ્રમાણે મતદાન