VIDEO : 'હમારે રામ આયે હે...' રામલલાની પ્રાણ પ્રતિષ્ઠા બાદ વાયરલ થયું રામ-સીતાનું નવું ગીત

Image Source: Twitter

નવી દિલ્હી, તા. 22 જાન્યુઆરી 2024 સોમવાર

તમામ લોકો 22 જાન્યુઆરીની આતુરતાથી રાહ જોઈ રહ્યા હતા અને આખરે તે દિવસ આવી જ ગયો અને અયોધ્યામાં ભવ્ય કાર્યક્રમની સાથે રામલલાની પ્રાણ-પ્રતિષ્ઠા કરવામાં આવી. 22 જાન્યુઆરી પહેલા એક ગીત 'રામ આએંગે' સોશિયલ મીડિયા પર ખૂબ વાયરલ થયુ. આ ગીત પર ઘણી રીલ બની અને ઘરે-ઘરે આ ગીતને સાંભળવામાં પણ આવ્યુ.

રામલલાની પ્રાણ પ્રતિષ્ઠા બાદ હવે વધુ એક ગીત રિલીઝ સાથે જ સોશિયલ મીડિયા પર વાયરલ થઈ ચૂક્યુ છે. જેમાં ટીવી શો રામાયણમાં પ્રભુ શ્રીરામની ભૂમિકા નિભાવનાર દિગ્ગજ અભિનેતા અરુણ ગોવિલ, સીતા માતાની ભૂમિકા નિભાવનાર દીપિકા ચિખલિયા અને લક્ષ્મણની ભૂમિકા નિભાવનાર સુનીલ લહરી એક સાથે જોવા મળી રહ્યા છે.

અરુણ ગોવિલ, દીપિકા ચિખલિયા અને સુનીલ લહરીનું નવુ ગીત 'હમારે રામ આએ હૈ' રિલીઝ સાથે જ સોશિયલ મીડિયા પર વાયરલ થઈ ચૂક્યુ છે અને આ ગીતને જોયા બાદ લોકો ખૂબ ભાવુક પણ થઈ રહ્યા છે. અત્યાર સુધી આ ગીતને 6 લાખથી વધુ વખત જોવામાં આવી ચૂક્યુ છે અને લોકો કમેન્ટ કરીને વીડિયો પર જય શ્રીરામના નારા પણ લગાવી રહ્યા છે.

આ ગીતનું શૂટિંગ 22 જાન્યુઆરી પહેલા જ અયોધ્યામાં પુરુ કરી લેવાયુ હતુ, જે માટે અરુણ ગોવિલ, દીપિકા ચિખલિયા અને સુનીલ લહરી ખૂબ પહેલા જ અયોધ્યા પહોંચી ગયા હતા. આ ગીતને રિલીઝ બાદ અરુણ ગોવિલે પોતાના ઈન્સ્ટાગ્રામ પર એક પોસ્ટ કરતા લખ્યુ, 'પ્રતિષ્ઠિત તિકડી લોટ આઈ! અરુણ ગોવિલ, દીપિકા ચિખલિયા અને સુનીલ લહરી 'હમારે રામ આએ હે' માં ચમકે છે, જે આપણને રામાયણની શાશ્વત આકર્ષણની યાદ અપાવે છે'.