પુષ્પા-ટુની રીલિઝની તડામાર તૈયારીઓ, છ શહેરોમાં ઈવેન્ટ થશે

- અર્જુન અને રશ્મિકાનું પ્રમોશન ટૂરનું ભરચક શિડયૂલ

- હિંદી બેલ્ટના દર્શકોને ધ્યાને રાખી ફિલમનું ટ્રેલર પટણામાં રીલિઝ કરાય તેવી અટકળો

મુંબઇ : અલ્લુ અર્જુન અને રશ્મિકા મંદાનાની ફિલ્મ 'પુષ્પા ટૂ' આગામી પાંચમી ડિસેમ્બરે રીલિઝ થવાની છે. તેની રીલિઝ માટે અત્યારથી જ તડામાર તૈયારીઓ શરુ થઈ ગઈ છે. 

આગામી  દિવસોમાં જ ફિલ્મનું પ્રમોશન શરુ થઈ જશે. ૧૫ નવેમ્બરથી અલ્લુ અર્જુન અને રશ્મિકા મદાના પોતાની ફિલ્મને પ્રમોટ કરવા ૧૫ દિવસ સુધી અલગ-અલગ શહેરોમાં ફરશે. જેમાં પટણા, કોચ્ચિ, ચેન્નઇ, બેંગ્લુરુ, મુંબઇ અને હૈદરાબાદ સામેલ છે. પટણામાં કદાચ ટ્રેલર લોન્ચ કરાશે. આ ફિલ્મના પહેલા ભાગને હિંદી બેલ્ટમા જબ્બર સફળતા મળી હતી. તેમને ધ્યાને રાખીને  પટણામાં ટ્રેલર રીલિઝનો નિર્ણય લેવાયો હોવાનું કહેવાય છે. 

ઉલ્લેખનીય છે કે, પુષ્પા ટુની રીલિઝ  તારીખ આ પહેલા બે વખત બદલવામાં આવી છે. પહેલા આ ફિલ્મને ઓગસ્ટ મહિનામાં  રજૂ કરવાની હતી પરંતુ પછીથી  છ ડિસેમ્બરની  તારીખ નક્કી કરવામાં આવી હતી. પરંતુ હવે આ ફિલ્મ આગલા દિવસે પાંચમી ડિસેમ્બરે રીલિઝ થશે. 

બીજી તરફ રશ્મિકાની જ ફિલ્મ 'છાવા' પણ તા. છઠ્ઠી ડિસેમ્બરથી રીલિઝ થવાની છે.