ફેમિલી મેન થ્રીમાં નિમરત કૌર નેગેટિવ રોલમાં દેખાશે

- સીઝન ટૂમાં સામંથા નેગેટિવ રોલમાં હતી

- જયદીપ અહલાવત પણ નેગેટિવ રોલમાં હોવાની ચર્ચા પરંતુહજુ સુધી તેની ભૂમિકાની વિગતો જાહેર નહિ

મુંબઈ : મનોજ વાજપેયીની સફળ વેબ સીરિઝ 'ફેમિલી મેન'ની ત્રીજી સીઝનમાં નિમરત કૌરની પણ એન્ટ્રી થઈ છે. તે નેગેટિવ રોલ કરવાની હોવાનું કહેવાય છે.

આ સીરિઝમાં જયદીપ અહલાવત પણ નેગેટિવ ભૂમિકામાં હોવાનું કહેવાય છે. જોકે, મેકર્સ દ્વારા હજુ સુધી અહલાવતનાં પાત્ર વિશે કોઈ વિગતો જાહેર કરાઈ નથી. અહલાવત ઓલરેડી નાગાલેન્ડ પહોંચી ગયો છે અને આ સીરિઝના શૂટિંગમાં જોડાઈ ગયો છે. 

આ સીરિઝની બીજી સીઝનમાં સામંથા રુથ પ્રભુ નેગેટિવ રોલમાં હતી. તેની એ ભૂમિકા બહુ ચર્ચાઈ હતી અને ખાસ કરીને હિંદી ભાષી દર્શકોમાં સામંથા આ રોલ બાદ જ વધારે લોકપ્રિય બની હતી. સામંથાના ભાગે ભરપૂર એકશન દ્રશ્યો પણ આવ્યાં હતાં. નિમરત પણ ત્રીજી સીઝનમાં એક્શન કરતી જોવા મળશે કે કેમ તે અંગે અટકળો સેવાય છે.

નિમરત ચીલાચાલુ ભૂમિકાઓ કરતાં અલગ રોલ કરવા માટે જાણીતી છે. ઈરફાન સાથેની ફિલ્મ 'લંચ બોક્સ'માં તેની એક્ટિંગની પ્રશંસા થઈ હતી. તે અમેરિકન સીરિઝ 'હોમલેન્ડ'માં પણ કામ કરી ચૂકી છે.