બેક-ટૂ-બેક 3 ફ્લોપ ફિલ્મો, છતા પણ છે સુપરસ્ટાર, હવે એક્ટર પર મેકર્સે લગાવ્યો 1100 કરોડનો દાવ

નવી મુંબઇ,તા. 8 ડિસેમ્બર 2023, શુક્રવાર 

ફિલ્મ ઈન્ડસ્ટ્રીમાં એવા ઘણા સ્ટાર્સ છે, જેઓ શરૂઆતમાં બેક ટુ બેક ફ્લોપ ફિલ્મો આપે છે અને પછી ધીમે ધીમે ટ્રેક પર આવીને હિટ ફિલ્મો આપવાનું શરૂ કરે છે. આ લિસ્ટમાં દક્ષિણનો એક સુપરસ્ટાર છે, જેને ભારતમાં સૌથી વધુ કમાણી કરનારા અભિનેતાઓમાંના એક કહેવાય છે. એક્ટરની એક ફિલ્મને કારણે દક્ષિણ સિનેમા હિન્દી બેલ્ટમાં લોકપ્રિય બન્યું છે. જો કે, હવે આ સુપરસ્ટાર્સ સતત ફ્લોપ ફિલ્મો આપી રહ્યા છે પરંતુ તેમ છતાં મેકર્સે તેમના પર 1100 કરોડ રૂપિયાથી વધુનો દાવ લગાવ્યો છે. આ સુપરસ્ટાર બીજું કોઈ નહીં પણ 'બાહુબલી' પ્રભાસ છે. 

પ્રભાસે પોતાના કરિયરમાં જેટલી ફ્લોપ ફિલ્મો આપી છે તેટલી જ તેણે બ્લોકબસ્ટર ફિલ્મો આપી છે.44 વર્ષીય પ્રભાસ હાલમાં બેચલર છે. ભલે તેને તેના અંગત જીવનમાં હજુ સુધી પ્રેમ મળ્યો નથી, પરંતુ તે ફિલ્મી પડદા પર અભિનેત્રીઓ સાથે ઘણો રોમાન્સ કરે છે. 

પ્રભાસ તેની સ્ટાઈલ અને અભિનયથી લાખો લોકોના દિલની ધડકન બની ગયો છે. આ જ કારણ છે કે બેક ટુ બેક ફ્લોપ આપવા છતાં પણ ફિલ્મ નિર્માતાઓને આ સ્ટાર પર વિશ્વાસ છે.

'બાહુબલી 2: ધ કન્ક્લુઝન'ની ઐતિહાસિક સફળતા બાદ પ્રભાસ ગ્લોબલ સ્ટાર બની ગયો છે. આવી સ્થિતિમાં ચાહકોને તેની આગામી ફિલ્મો પાસેથી ઘણી અપેક્ષાઓ છે.

જો કે છેલ્લા કેટલાક વર્ષોમાં પ્રભાસ તેના ચાહકોની અપેક્ષાઓ પર ખરો ઉતરી શક્યો નથી. પ્રભાસ છેલ્લા 6 વર્ષથી તે બેક ટુ બેક ફ્લોપ ફિલ્મો આપી રહ્યો છે. તે એક્શન થ્રિલર 'સાહો' (2019) માં જોવા મળ્યો હતો, જેની શરૂઆત સારી રહી હતી પરંતુ પછીથી લોકોએ તેને પણ નકારી કાઢી હતી.

આ પછી પ્રભાસ રોમેન્ટિક ડ્રામા 'રાધે શ્યામ' (2022) માં જોવા મળ્યો હતો, જેના કારણે મેકર્સને 170 કરોડ રૂપિયાનું નુકસાન થયું હતું. આ પછી તે પૌરાણિક ફિલ્મ 'આદિપુરુષ' (2023)માં દેખાયો અને તે પણ મોટી ફ્લોપ રહી, જેના કારણે અંદાજે 200 કરોડ રૂપિયાનું નુકસાન થયું. આવી સ્થિતિમાં, કરોડો રૂપિયાનું નુકસાન થવા છતાં, ફિલ્મ નિર્માતાઓએ અભિનેતા પર 1100 કરોડ રૂપિયાની શરત લગાવી છે. 

મહત્વનું છેકે, અભિનેતાની આગામી ફિલ્મ 'સલાર' 400 કરોડ રૂપિયાના બજેટમાં અને 'કલ્કી 2898 એડી' 700 કરોડ રૂપિયાના બજેટમાં બની છે. આવી સ્થિતિમાં આ મોટી ફિલ્મો દ્વારા પ્રભાસના 1100 કરોડ રૂપિયા દાવ પર લાગેલા છે.