Koffee With Karan 8: કરણ જોહરના શોની ગેસ્ટ બનશે સારા અને અનન્યા પાંડે

નવી દિલ્હી,તા. 3 નવેમ્બર 2023, શુક્રવાર  

કરણ જોહરનો ચેટ શો કોફી વિથ કરણની સીઝન 8 ચાલી રહ્યો છે. શોનો પહેલો અને બીજો એપિસોડ જબરદસ્ત રહ્યો છે. દીપિકા પાદુકોણ અને રણવીર સિંહ પહેલા એપિસોડમાં આવ્યા હતા, જ્યારે દેઓલ ભાઈઓ સની અને બોબી બીજા એપિસોડમાં આવ્યા હતા. 

કરણ જોહર સેલેબ્સને તેમની પર્સનલ અને પ્રોફેશનલ લાઈફને લઈને ઘણા પ્રશ્નો પૂછે છે. આ શોમાં સેલેબ્સ વિશે ઘણી એવી વાતો સામે આવી છે જેના વિશે બહુ ઓછા લોકો જાણે છે. બોલિવૂડની બે સુંદરીઓ સારા અલી ખાન અને અનન્યા પાંડે કોફી વિથ કરણ 8ના ત્રીજા એપિસોડમાં જોવા મળશે.

બોલિવૂડની બે સુંદરીઓ સારા અલી ખાન અને અનન્યા પાંડે ‘Koffee With Karan 8’ના ત્રીજા એપિસોડમાં જોવા મળશે.

રિપોર્ટ અનુસાર, આ શોમાં સારા અને અનન્યાનો અલગ અંદાજ જોવા મળશે. બંને પહેલી સીઝનની સરખામણીમાં ઘણી મસ્તી કરતા જોવા મળશે. તેમજ કરણ જોહર પણ બંનેને રસપ્રદ પ્રશ્નો પૂછતો જોવા મળશે.

સારા અલી ખાન ત્રીજી વખત આવશે

સારા અલી ખાન કરણના શોમાં પહેલીવાર નહીં પરંતુ ત્રીજી વખત આવવાની છે. આ પહેલાં તે તેના પિતા સૈફ અલી ખાન સાથે કોફી વિથ કરણમાં ડેબ્યૂ કર્યું હતું. તે સમયે સારાની ફિલ્મ કેદારનાથ રિલીઝ થવાની હતી. તે પછી સારા સિઝન 7માં જ્હાન્વી કપૂર સાથે આવી હતી. હવે સારા 8મી સીઝનમાં અનન્યા પાંડે સાથે જોવા મળશે.

જો અનન્યા પાંડેની વાત કરીએ તો તે પણ ત્રીજી વખત શોમાં આવવાની છે. સૌ પ્રથમ, અનન્યા તેની પ્રથમ ફિલ્મ ‘સ્ટુડન્ટ ઑફ ધ યર 2’ના રિલીઝ સમયે તારા સુતરિયા અને ટાઈગર શ્રોફ સાથે આવી હતી. 7મી સીઝનમાં અનન્યા તેના લિગર કો-સ્ટાર ‘વિજય દેવેરાકોંડા’ સાથે શોમાં આવી હતી. હવે અનન્યા બોલિવૂડની બ્યુટી સારા સાથે ખૂબ જ મસ્તી કરતી જોવા મળશે.