તનુ વેડ્સ મનુ થ્રીમાં કંગના રણૌતનો ટ્રિપલ રોલ હશે

- ફિલ્મ 2026માં રીલિઝ થાય તેવી સંભાવના

- તનુ વેડ્સ મનુ રિટર્ન્સમાં કંગના ડબલ રોલમાં હતી, તેના અંતથી જ ત્રીજા ભાગની વાર્તા શરુ થશે

મુંબઇ : કંગના રણૌતની કારકિર્દીની સૌથી મહત્વની ગણાતી 'તનુ વેડ્સ મનુ' ફિલ્મનો ત્રીજો ભાગ બની રહ્યો છે. આ ફિલ્મના બીજા ભાગ 'તનુ વેડ્સ મનુ રિટર્ન્સ'માં કંગના ડબલ રોલમાં હતી તો ત્રીજા ભાગમાં તે ટ્રિપલ રોલમાં હશે એમ જાણવા મળે છે. 

'તનુ વેડ્સ મનુ રિટર્ન્સ'નો જ્યાં અંત આવે છે ત્યાંથી જ ત્રીજા ભાગની વાર્તા શરુ થશે. દિગ્દર્શક આનંદ એલ. રાય અને લેખક હિમાંશુ શર્માની બેલડીએ ફિલ્મની સ્ક્રિપ્ટ પર કામ શરુ કરી દીધું છે. ફિલ્મનું શૂટિંગ આગામી વર્ષે શરુ થશે અને ૨૦૨૬માં રીલિઝ કરી દેવાશે. 

'તનુ વેડ્સ મનુ'  અને 'તનુ વેડ્સ મનુ રિટર્ન્સ' એ બંને કંગનાની કારકિર્દીની સૌથી નોંધપાત્ર અને યાદગાર ફિલ્મોમાં ગણાય છે. 'તનુ વેડ્સ મનુ રિટર્ન્સ'માં કંગનાએ વિદેશ શિફ્ટ થયેલી મૂળ યુપીની યુવતીની સાથે સાથે એક હરિયાણવી સ્પોર્ટસ પર્સન યુવતીની બેવડી ભૂમિકા ભજવીને કમાલ સર્જી હતી. ફિલ્મના બંને ભાગમાં આર. માધવન તેનો હિરો હતો. બંને ભાગના ગીતો પણ બહુ લોકપ્રિય બન્યાં હતાં.