હંસલ મહેતાની ગાંધી સીરિઝમાં એ. આર. રહેમાનનું મ્યુઝિક

- સીરિઝ આગામી વર્ષે રીલિઝ થશે

- રામચંદ્ર ગુહાના પુસ્તકના આધારે સીરિઝ બની રહી છે ,પ્રતીક ગાંધી  મુખ્ય ભૂમિકામાં

મુંબઈ : હંસલ મહેતાની 'ગાંધી' સીરિઝમાં એ. આર. રહેમાન મ્યુઝિક આપી રહ્યા છે. આજે ગાંધી જયંતીના દિવસે રહેમાન તથા હંસલ મહેતાએ આ જાહેરાત કરી હતી.

હંસલ મહેતાની આ વેબ સીરિઝમાં પ્રતીક ગાંધી મહાત્મા ગાંધીની ભૂમિકામાં છે. આ સીરિઝ આગામી વર્ષે રીલિઝ થવાની સંભાવના છે. સીરિઝ માટે રામચંદ્ર ગુહાના પુસ્તકનો આધાર લેવાયો છે. 

રહેમાને આ જાહેરાત કરતાં કહ્યું હતું કે ગાંધીજીના જીવનપ્રસંગો બહુ રસપ્રદ છે. તેમના સત્યના પ્રયોગો અને તેઓ સતત કેવી રીતે પરિવર્તન સાધતા ગયા તે જીવનપ્રસંગો પ્રેરણાદાયી છે. આ સીરિઝ સાથે સંકળાવા મળ્યું તેને હું મારું અહોભાગ્ય માનું છું. 

હંસલ મહેતાએ કહ્યું હતું કે ગાંધીજીની વાત જે સ્તરે અને જે ગાંભીર્ય સાથે કહેવાઈ રહી છે તેને રહેમાનના સંગીત દ્વારા વધુ  અસરકારક રીતે રજૂ કરી શકાશે.