બોલિવૂડમાં ભારે બબાલ: આ અભિનેત્રીએ આલિયા ભટ્ટ પર કર્યો હુમલો, તો કરણ જોહરે જવાબમાં કહ્યું, 'મૂર્ખ'

Divya Khosla Kumar accuse Alia Bhatt's 'Jigra' movie : આલિયા ભટ્ટ અને વેદાંગ રૈના સ્ટારર ફિલ્મ 'જીગરા' 11 ઓક્ટોબરે સિનેમાઘરોમાં રિલીઝ થઈ ગઈ છે. જેને લઈને ઈન્ડસ્ટ્રીમાં એક નવો વિવાદ થઈ રહ્યો છે. તાજેતરમાં દિવ્યા ખોસલા કુમારે આલિયા ભટ્ટની ફિલ્મ 'જીગરા' વિશે એક પોસ્ટ સોશિયલ મીડિયા પર શેર કરી હતી. જેમાં તેણે દાવો કર્યો હતો કે 'જીગરા'નું બોક્સ ઓફિસ કલેક્શન નકલી છે. સિનેમાઘરો ખાલી છે અને કોઈ પણ આલિયાની ફિલ્મ જોવા જઈ રહ્યું નથી. દિવ્યાએ ઇન્સ્ટાગ્રામ સ્ટોરી પર 'જીગરા' અને આલિયા ભટ્ટ સાથે સંબંધિત એક પોસ્ટ શેર કરી હતી. જેણે હલચલ મચાવી દીધી હતી. અને હવે આ પોસ્ટને કારણે બોલિવૂડમાં એક નવું યુદ્ધ ફાટી નીકળતું જોવા મળી રહ્યું છે.

દિવ્યા ખોસલાએ આલિયા પર આરોપ લગાવ્યા

આલિયા પર 'જીગરા' ફિલ્મનું નકલી કલેક્શન બતાવવાનો આરોપ લગાવતા દિવ્યા ખોસલાએ ખાલી સિનેમાઘરોની તસવીર શેર કરી હતી. અને કેપ્શનમાં લખ્યું હતું કે, 'તમે પોતે ટિકિટ બૂક કરાવો અને નકલી કલેક્શને જાહેર કરો. હું 'જીગરા'ને જોવા માટે સિટી ઑફ મોલ પીવીઆરમાં ગઈ હતી, જ્યાં સિનેમાઘર પૂરું ખાલી હતું. આલિયા ભટ્ટ તમારામાં સાચે જ 'જીગરા' છે. પોતે જ ટિકિટ ખરીદી અને નકલી કલેક્શનને જાહેર કરી દીધું.'

કરણ જોહરે પોસ્ટ શેર કરી 

દિવ્યા ખોસલાની આ પોસ્ટ પછી કરણ જોહરે તેની ઈન્સ્ટાગ્રામ સ્ટોરી પર એક પોસ્ટ શેર કરી હતી. જેમાં તેણે કોઈનું નામ તો નથી લીધું, પરંતુ પોસ્ટને જોઈને કહેવાઈ રહ્યું છે કે કરણે આ પોસ્ટ દ્વારા દિવ્યા ખોસલાને જવાબ આપ્યો છે. તેણે પોતાની પોસ્ટમાં લખ્યું, 'મૂર્ખને આપવામાં આવેલું શ્રેષ્ઠ ભાષણ મૌન છે.'

દિવ્યાએ પણ સામે જવાબ આપ્યો 

કરણ જોહરે ભલે પોતાની પોસ્ટમાં દિવ્યાના નામનો ઉલ્લેખ ન કર્યો હોય. પરંતુ દિવ્યાએ પણ સામે જવાબ આપવામાં મોડું કર્યું ન હતું. દિવ્યાએ એક પોસ્ટ શેર કરી લખ્યું હતું કે, 'સત્ય હંમેશા મૂર્ખોને અપમાનિત કરે છે.' આ સિવાય અન્ય એક પોસ્ટમાં દિવ્યાએ લખ્યું હતું કે, 'જ્યારે તમે બેશરમીથી બીજાની સાચી વસ્તુઓને ચોરવાની ટેવ પાડો છો, ત્યારે તમે હંમેશા મૌનનો આશરો લો છો. તમારી પાસે કોઈ અવાજ નથી હોતો.'

'જીગરા'એ પહેલા દિવસે 4.5 કરોડ રૂપિયાનું કલેક્શન કર્યું

એક અહેવાલ અનુસાર, આલિયાની ફિલ્મ 'જીગરા'એ બોક્સ ઓફિસ પર પહેલા દિવસે 4.5 કરોડ રૂપિયાનું કલેક્શન કર્યું હતું. જો કે, દિવ્યા ખોસલાને ફિલ્મના પહેલા દિવસના કલેક્શનને લઈને વિશ્વાસ થતો નથી. તેના અનુસાર, ફિલ્મના કલેક્શનના આંકડાઓ પ્રોડક્શન હાઉસના કહેવા પર જારી કરવામાં આવ્યા છે, જે હિન્દી સિનેમાના મુખ્ય ફિલ્મ સ્ટુડિયોમાંથી એક ગણાય છે. જો કે રસપ્રદ વાત એ છે કે દિવ્યાની ફિલ્મ 'સાવી'માં પણ આલિયાની 'જીગરા' જેવી જ જેલ બ્રેક સ્ટોરી દર્શાવવામાં આવી હતી. 'સાવી' સિનેમાઘરોમાં બે અઠવાડિયામાં માત્ર 7.83 કરોડ રૂપિયાની જ કમાણી કરી શકી હતી. 'ચંદુ ચેમ્પિયન'ને કારણે ફિલ્મને સિનેમાઘરોમાં વધુ દર્શકો મળી શક્યા ન હતા.

આલિયા પર હુમલો કરવા પાછળનું બીજું કારણ દિવ્યાના પતિ ભૂષણ કુમાર?

'જીગરા' ફિલ્મની વાત કરીએ તો ફિલ્મે પહેલા દિવસે 4.5 કરોડની કમાણી કરી હતી. દિવ્યાનો આલિયા પર હુમલો કરવા પાછળનું બીજું કારણ રાજકુમાર રાવ અને તૃપ્તિ ડિમરી સ્ટારર ફિલ્મ 'વિકી વિદ્યા કા વો વાલા વિડિયો' હોવાનું માનવામાં આવી રહ્યું છે. જે બોક્સ ઓફિસ પર 'જીગરા' સામે ટકરાઈ હતી. 'વિકી વિદ્યા કા વો વાલા વીડિયો' ફિલ્મ દિવ્યાના પતિ ભૂષણ કુમારે બનાવી છે.