વર્લ્ડ કપની મોડી પોસ્ટ માટે આલિયા ટ્રોલ થઈ, અમિતાભે મેચ જ ન જોઈ

- વિશ્વ કપ વિજયથી બોલીવૂડ ખુશખુશાલ

- અમિતાભ પોતાની જાતને ઈન્ડિયન ટીમ માટે અનલકી માને છે

મુંબઈ : ટી ટ્વેન્ટી વર્લ્ડ કપમાં ભારતના વિજયથી બોલીવૂડ પણ ઝૂમી ઉઠયું હતું અને લગભગ તમામ સ્ટાર્સએ સોશિયલ મીડિયા પર ખુશી વ્યક્ત કરતી પોસ્ટ કરી હતી. જોકે, આલિયા તેમાં મોડી પડતાં ચાહકોએ તેને ટ્રોલ કરી હતી. જ્યારે અમિતાભે જાહેર કર્યું હતું કે પોતે તો મેચ જોઈ જ ન હતી. મોટાભાગના સ્ટાર્સએ ગઈ મોડી રાતે જ  પોતાની ખુશાલી દર્શાવતી પોસ્ટ કરી હતી. જોકે, આલિયા ભટ્ટે છેક રવિવારે સવારે પોસ્ટ કરી હતી.આથી ચાહકો તેના પર નારાજ થયા હતા. કેટલાક લોકોએ લખ્યું હતું કે ગઈકાલે રાતે વહેલી ઊંઘી ગઈ હતી કે શું, કોઈએ લખ્યું હતું કે કમસેકમ મેચ જોઈ લીધી હોત તો સારું હતું. કોઈએ લખ્યું હતું કે સારું થયું કે તે અમને જાણ કરી બાકી, પરિણામની તો ખબર જ ન પડત, એક ચાહકે કોમેન્ટ કરી હતી કે હવે રણબીરે આલિયાનું સારું લગાડવા માટે તેના એકાઉન્ટ પરથી પોસ્ટ કરી છે. 

બીજી તરફ અમિતાભ બચ્ચને પોતાની પોસ્ટમાં ટીમ ઈન્ડિયને અભિનંદન આપતી વખતે જોકે કબૂલ્યું હતું કે આ મેચ મેં જોઈ જ નથી. અમિતાભના જણાવ્યા અનુસાર પોતે જ્યારે જ્યારે પણ ટીમ ઈન્ડિયાની મેચ જુએ છે ત્યારે ત્યારે આપણી ટીમ હારી છે. 

એટલે પોતે દર વખતે ટીમ ઈન્ડિયાની મેચ જોવાથી દૂર જ રહે છે. 

વિશ્વ કપ વિજયની સાથે સાથે વિરાટ કોહલી તથા રોહિત શર્માએ આંતરરાષ્ટ્રીય ટી ટ્વેન્ટી ફોર્મેટમાંથી પોતાની નિવૃત્તિ જાહેર કરી હતી. રણવીર સિંહ સહિતના કલાકારોએ આ અંગે અફસોસ પણ વ્યક્ત કર્યો હતો.