અજય દેવગણનાં દિગ્દર્શન હેઠળની ફિલ્મમાં અક્ષય કુમાર મુખ્ય ભૂમિકામાં

- એક્શન હશે કે કોમેડી તે અંગે અટકળો

- અક્ષય એક્ટર તરીકે તો અજય પણ ડાયરેક્ટર તરીકે ફલોપ રહ્યો હોવાની ટીખળ

મુંબઈ:અજય દેવગણે પોતાના દિગ્દર્શન હેઠળની ફિલ્મમાં અક્ષય કુમાર મુખ્ય ભૂમિકા ભજવશે તેવી જાહેરાત કરી છે. 

આ ફિલ્મ એક્શન ફિલ્મ હશે કે કોમેડી તે અંગે અટકળો થઈ રહી છે. અક્ષય કુમાર હાલ મુખ્યત્વે આ બે જોનરમાં જ કામ કરી રહ્યો છે. 

અજય દેવગણ પોતે બોલીવૂડનો સ્થાપિત હિરો છે. આ અગાઉ તે ડાયરેક્ટર તરીકે 'ભોલા',  'રન વે ૩૪', 'શિવાય' અને 'યુ મી ઔર હમ' જેવી ફિલ્મો બનાવી ચૂક્યો છે. તેણે પોતાના  દિગ્દર્શન હેઠળની ફિલ્મમાં અક્ષય જેવા બીજા સ્થાપિત કલાકારને લેવાનું નક્કી કર્યું છે એ એક રસપ્રદ ઘટનાક્રમ છે એવું ટ્રેડ સમીક્ષકો કહે છે. 

જોકે, નેટ યૂઝર્સ દ્વારા એવી ટીખળ થઈ રહી છે કે અજય દેવગણની દિગ્દર્શક તરીકેની મોટાભાગની ફિલ્મો ફલોપ ગઈ છે બીજી તરફ અક્ષય કુમાર પણ એક પછી એક ફલોપ ફિલ્મો આપી રહ્યો છે. આ સંજોગોમાં બંને ફલોપ કલાકારો ભેગા થઈને નવું શું ઉકાળે છે તેની દર્શકો રાહ જોશે. 

અજય દેવગણે એક  સંવાદમાં આ જાહેરાત કરી હતી. જોેકે, તેેણે ફિલ્મનું ટાઈટલ, સબ્જેક્ટ કે અન્ય કલાકારો વિશે કોઈ વિગતો આપી નથી.