રશ્મિકા અને કેટરીના બાદ હવે સારા બની ડીપફેકનો શિકાર, ગિલ સાથેનો નકલી ફોટો થયો વાયરલ

Image: Sara Tendulkar and Shubman Gill Instagram

નવી મુંબઇ,તા. 8 નવેમ્બર 2023, બુધવાર      

ફિલ્મ પુષ્પામાં અલ્લુ અર્જુન સાથે ચમકેલી પુષ્પા એટલે કે, રશ્મિકા મંદાના ડિપફેક વાયરલ વીડિયોને કારણે ચર્ચામા છે.  આ વીડિયોમાં સોશિયલ મીડિયા ઇન્ફ્લએંજર ઝારા પટેલના ચહેરાને એડિટ કરીને અભિનેત્રીનો ચહેરો મુકવામાં આવ્યો હતો. વીડિયો વાયરલ થતાં જ એક્ટ્રેસના ફેન્સ અને કેટલાક અન્ય સેલેબ્સ ડીપફેક્સ સામે અવાજ ઉઠાવવા લાગ્યા અને એક્ટ્રેસના સપોર્ટમાં પણ ઉતર્યા હતા.  રશ્મિકા પછી, ટાઇગર 3ના એક દ્રશ્યમાંથી કેટરિના કૈફનો પણ એડિટ કરેલો ફોટો પણ ગઈકાલે વાયરલ થયો હતો. રશ્મિકા-કેટરિના બાદ હવે સચિન તેંડુલકરની પુત્રી સારા તેંડુલકરનો ક્રિકેટર શુભમન ગિલ સાથેનો ફેક ફોટો વાયરલ થઈ રહ્યો છે. 

શુભમન સાથે સારાનો ફેક ફોટો વાયરલ 

સચિન તેંડુલકરની પુત્રી સારા તેંડુલકરનું નામ ક્રિકેટર શુભમન ગિલ સાથે જોડાયું છે અને બંનેની એક તસવીર પણ સોશિયલ મીડિયા પર વાયરલ થઈ રહી છે. એવું કહેવામાં આવી રહ્યું છે કે, સારાએ શુભમન સાથેના સંબંધોને મંજૂરી આપી દીધી છે અને આ કેપ્શન સાથે આ તસવીર શેર કરવામાં આવી રહી છે. જોકે, આ ફોટો ફેક છે અને તેને એડિટ કરીને શેર કરવામાં આવ્યો છે. 

સારા સાથે અર્જુન છે 

સારા-શુભમનની આ તસવીર ફેક છે. હકીકતમાં, રિયલ ફોટોમાં સારાનો ભાઈ અર્જુન તેની સાથે હાજર છે. અસલી તસવીર સારાએ 24 સપ્ટેમ્બરે ભાઈ અર્જુનના જન્મદિવસ પર શેર કરી હતી. સારાએ ઘણી તસવીરો શેર કરી હતી, જેમાંથી એક આ તસવીર હતી. આ જ તસવીર સોશિયલ મીડિયા પર શુભમનની મોર્ફ કરેલી તસવીર સાથે શેર કરવામાં આવી રહી છે.