કિશોર કુમારની બાયોપિક માટે હવે આમિર ખાનને ઓફર

- અગાઉ રણબીર કપૂરને ઓફર અપાઈ હતી

- આમિર ખાન અને અનુરાગ બસુ વચ્ચે અનેક બેઠકો થઈઃ હજુ ફાઈનલ થવાનું બાકી

મુંબઇ : અનુરાગ બસુ સ્વ. અભિનેતા અને ગાયક કિશોર કુમારની બાયોપિક બનાવી રહ્યો છે. હવે આ ફિલ્મને લઇને રિપોર્ટ છે કે, અનુરાગ બસુએ કિશોર કુમારની બાયોપિક માટે આમિર ખાનનો સંપર્ક કર્યો છે.  પહેલા એવા રિપોર્ટસ હતા કે ફિલ્મ નિર્માતા ભૂષણ કુમારે  કિશોર કુમારની બાયોપિકમાં મુખ્ય ભૂમિકા માટે રણબીર કપૂરનો સંપર્ક કર્યો છે.  

પરંતુ હવે એક અહેવાલમાં ં દાવો કરવામાં આવ્યો છે કે, અનુરાગ બસુએ આમિર ખાનનો સંપર્ક કર્યો છે.  અનુરાગ બસુ અને આમિર ખાન વચ્ચે એકથી વધુ બેઠકો પણ થઈ ચૂકી છે. આમિરને ફિલ્મની સ્ક્રિપ્ટ પસંદ પડી છે. આમિર પોતે પણ કિશોર કુમારનો ચાહક છે. જોકે, હજુ સુધી તેણે આ પ્રોજેક્ટ માટે આખરી સંમતિ આપી નથી. 

આમિર ખાને 'લાલ સિંહ ચઢ્ઢા' ફિલ્મની નિષ્ફળતા બાદ એક્ટિંગમાંથી બ્રેક લીધો હતો.  પરંતુ હવે અભિનેતા બોલીવૂડમાં ફરી સક્રિય થયો છે . હાલમાં તેણે 'સિતારે ઝમીન પર'નું શૂટિંગ પૂર્ણ કર્યું છે. હવે તે 'ગઝની ટૂ' બનાવવાની પણ ફિરાકમાં છે.