શું રણબીર કપૂર હવે ટી-સિરીઝવાળા ગુલશન કુમારની બાયોપિક કરશે?

- રણબીર કપૂર બડો ઉસ્તાદ છે. એણે સોશિયલ મીડિયા પર ફેક અકાઉન્ટ્સ બનાવ્યા છે. આ રીતે એ છૂપી રીતે ફિલ્મી હસ્તીઓની એક્ટિવિટીઝ પર બાજનજર રાખે રાખે છે!

રણ ણબીર કપૂર ૨૮ સપ્ટેમ્બરે ૪૨ વર્ષનો થયો તે સાથે તે હવે યુવાનીની બીજી તરફ પહોંચી ગયો છે.  આ વર્ષે એનિમલ સુપરહીટ નીવડી હોવાથી હાલ તો રણબીર કપૂર કામના મામલે તો અતિ વ્યસ્ત છે. એનિમલે બોક્સ ઓફિસ પર ૯૧૫ કરોડ રૂપિયાની કમાણી કરી  હોઇ હાલ તો રણબીરનો સિતારો બુલંદી પર છે. ૨૦૨૬ સુધી તે વિવિધ પ્રોજેક્ટ્સમાં વ્યસ્ત છે. હાલ તે  બ્રહ્માસ્ત્રના શૂટિંગમાં  બિઝી છે. સમય પરવાનગી આપે તો તે ભૂષણકુમાર સાથે મળી ગુલશનકુમારની બાયોપિક પણ કરી શકે છે. હાલ આ મામલે ચર્ચાવિચારણા ચાલી રહી છે. 

મુંબઇમાં પોતાના નવા નિવાસસ્થાને ૪૨મો જન્મદિન ઉજવવા માટે રણબીર કપૂર તસવીરકારો માટે ખાસ ગુલાબી રંગની  કેક લઇ આવ્યો હતો. તેમની હાજરીમાં કેક કાપી રણબીરે જન્મદિનની ઉજવણી કરી હતી. એ પછી પત્ની આલિયા અને પુત્રી રાહા સાથે ફેમિલિ આઉટિંગ માટે રવાના થયો હતો. રાહા અને રણબીર ઘોડાના તબેલામાં ફરતાં હોય તેવી તસવીર પણ વાઇરલ થઇ હતી. 

બીજી તરફ પત્ની આલિયાએ પણ રણબીરની કોઇએ જોઇ ન હોય એવી તસવીરો ચાહકો સાથે તેના જન્મદિને શેર કરી હતી. તેમના સાથે લીધેલાં ફોટાઓ જોવાની તેમના ચાહકોને મોજ પડી ગઇ હતી. તેમાં પણ એક તસવીરમાં આ હેપી પરિવારની ખાસ ક્ષણો ઝીલાઇ હતી. આ તસવીરમાં આલિયા, રણબીર અને રાહા એક વૃક્ષને બાથ ભીડીને ઉભાં  છે. તે  તસવીરની લાઇનમાં આલિયાએ જણાવ્યું છે કે ઘણીવાર જન્મદિને તમને ખુશ કરવા કોઇ બાથ ભીડીનેે ભેટી પડે એ જ પુરતું બની રહે છે. આ તસવીરમાં આલિયા અને રણબીરની આંખો બંધ છે પણ નાનકડી રાહા ટગર ટગર કેમેરાની સામે તાકી રહી હોવાથી આ તસવીર જીવંત બની રહી છે. 

રાહા કપૂરની વાત નીકળી છે તો એક શોમાં કરીના કપૂર સાથે વાત કરતાં આલિયાએ જણાવ્યું હતું કે રાહા તેને આલિયા ભટ્ટ કહી બોલાવે છે પણ જ્યારે રણબીરને બોલાવવો હોય ત્યારે તે પાપા ભટ્ટ કહી તેને પોકારે છે. રણબીર કપૂર પાસે હાલ કોઇ સત્તાવાર સોશ્યલ મિડિયા હેન્ડલ નથી પણ જાણકારોના મતે તેનું એક અનામી એકાઉન્ટ છે જેના દ્વારા તેનું કામ ચલાવવામાં આવે છે. કરીનાએ તાજેતરમાં એક શોમાં જ્યારે આલિયાને તેના પતિ રણબીરની સોશ્યલ મિડિયા સ્કીલ વિશે સવાલ કર્યો ત્યારે આલિયાએ વળતો સવાલ કર્યો હતો કે કઇ સ્કીલ ? પોસ્ટ કરવાની કે સ્ટોક એટલે કે પીછો કરવાની? અને જવાબમાં બંને જણીઓ ખિલખિલ કરી હસી પડી હતી. આના પરથી રણબીર કપૂર સોશ્યલ મિડિયા પર સેલિબ્રિટીઓને સ્ટોક  કરતો એટલે કે  તેમની એક્ટિવિટી પર નજર રાખતો હોવાની વાતમાં દમ હોવાનો  સંકેત મળે છે. આલિયા અને રણબીર ટૂંક સમયમાં સંજય લીલા ભણશાળીની ભવ્ય ફિલ્મ લવ એન્ડ વોરમાં રૂપેરી પડદે એકમેક સાથે જોવા મળશે. 

રણબીર પણ વધતી ઉંમર સાથે નવી ઇનિંગ ખેલવા માટે સજજ થઇ રહ્યો હોય તેમ તેણે એક લાઇફસ્ટાઇલ બ્રાન્ડ શરૂ કરી હોવાની વાતો થઇ રહી છે. કરણ જોેહરે ઇન્સ્ટા પર તેના ચાહકો વતી રણબીરને નવા સાહસ માટે અભિનંદન આપ્યા છે. રણબીરની માતા નીતુ કપૂરે પણ રણબીરને તેના જન્મદિને વધાઇ આપતાં તેના આ નવા સાહસમાં તેેને સફળતા મળે તેવી કામના વ્યક્ત કરી છે. આમ, રણબીરને બેતાલાં આવે કે ન આવે પણ તેની નજર હજી બિઝનેસને મામલે તો શાર્પ જણાય છે.