સૈફ અલી ખાનનું ક્વોટ માર્શલ .

- સિનેમા એક્સપ્રેસ - શિશિર રામાવત

- અમૃતા - સૈફ

- કરીના - સૈફ

ઓ લ મેન મસ્ટ મેરી મચ યંગર વીમેન. દરેક પુરૂષે પોતાના કરતાં ઘણી નાની ઉંમરની સ્ત્રી સાથે જ લગ્ન કરવાં જોઈએ. આ વિધાન સૈફ અલી ખાને એક સમયે કર્યું હતું. સૈફ કરતાં કરીના ૯ વર્ષ નાની છે. એની પૂર્વ-પત્ની અમૃતા સિંહ એના કરતાં સાડાઅગિયાર વર્ષ મોટી હતી. સૈફે પહેલાં લગ્ન કર્યાં ત્યારે સાવ ૨૧ વર્ષ અને બે મહિનાનું બચ્ચું હતો. બરાબર ૨૧ વર્ષ પછી, ૪૨ વર્ષની ઉંમરે એણે કરીના સાથે બીજાં લગ્ન કર્યાં. આ બે ઘટનાઓ વચ્ચે સૈફની પર્સનાલિટીમાં કેવાં કેવાં પરિવર્તનો આવ્યાં? સમયચક્રને ઊલટું ઘુમાવો અને એ બિંદુ પર પહોંચો કે જ્યારે સૈફ અલી ખાનની કરીઅર હજુ શરૂ પણ થઈ નથી. આ ૧૯૯૧ની વાત છે. ૨૧ વર્ષનો સૈફ, ૩૨ વર્ષની અમૃતા સિંહ એ સાથે લગ્ન કરી લે છે તે પછીના બે વર્ષ દરમિયાન સૈફની પહેલી ત્રણ ફિલ્મો રિલીઝ થાય છે - 'પરંપરા', 'આશિક આવારા' અને 'પેહચાન'.

ડિસેમ્બર ૧૯૯૩માં સૈફ કહે છેઃ  'અમૃતા સાથે લગ્ન કરવા સિવાય છૂટકો જ નહોતો. હું એના ઘરમાં રહેતો હતો અને એના ફ્રેન્ડ્ઝ કહ્યા કરતા હતા કે જો તું અમૃતાને ચાહતો ન હો અને એને પરણવા માગતો ન હો તો અહીં શું કામ પડયો છે? ચાલ્યો જા બીજે કશેક! હું લગ્ન કરવા તૈયાર થઈ ગયો. જોકે મને પછી થયું પણ ખરું કે મેં ક્યાંક વધારે પડતું મોટું પગલું તો ભરી નખી નાખ્યંુને? લગ્ન પછીના પહેલાં ત્રણ દિવસ હું સખત ટેન્શનમાં હતો. અમે ગુપચુપ પરણી ગયાં હોવાથી અમારાં પેરેન્ટ્સને હજુ જાણ કરવાની બાકી હતી એટલે ટેન્શનમાં નહોતો, પણ પણ મને ભય હતો કે ઓહ ગોડ! લાઈફની બીજી કેટલીય વસ્તુઓની જેમ હું ક્યાંક આ મેરેજ નામની વસ્તુથી પણ બોર તો નહીં થઈ જાઉંને!'

સૈફની કરીઅર ડચકાં ખાતી ખાતી આગળ વધે છે. કરીઅરનાં પહેલાં આઠ વર્ષમાં એ કેટલીય ચક્રમ જેવી ફિલ્મો કરે છે. આ બધામાં સૈફની માંડ બે ફિલ્મો ઢંગની આવે છે, 'મૈં ખિલાડી તું અનાડી' અને 'કચ્ચે ધાગે'.

ડિસેમ્બર ૧૯૯૯માં સૈફકુમાર કહે છેઃ 'પૈસાના મામલામાં હું મારી ઉંમરના બીજા કોઈ પણ જુવાન જેટલો જ ઈન્સિક્યોર છું. સત્તર વર્ષનો હતો ત્યારથી મેં મમ્મી-પપ્પા પાસેથી મેં એક રૂપિયો લીધો નથી. અમૃતા ઈચ્છે છે કે લાઈફમાં મને બધું જ બેસ્ટ મળે અને એ બેસ્ટ હું એની સાથે શર કરું...'

સૈફની કરીઅરમાં ખરો ટનગ પોઈન્ટ આવે છે, અફલાતૂન 'દિલ ચાહતા હૈ'થી. બે બચ્ચાંનો બાપ બની ગયેલો સૈફ એપ્રિલ ૨૦૦૨માં કહે છેઃ 'બાળકોને લીધે હું અને અમૃતા એક જુદા જ લેવલ પર જોડાઈ ગયાં છીએ. બાળકોની નજરોમાં અમે પરફેક્ટ પેરેન્ટ્સ છીએ. આથી હું અને અમૃતા પણ સાચા અર્થમાં પરફેક્ટ પેરેન્ટ્સ બની રહેવા માગીએ છીએ. અમૃતા મારી લગામ પોતાના હાથમાં ઝાલી રાખે છે. સાચું કહંુ, અમૃતા મને કંટ્રોલમાં રાખે એની સામે મને કોઈ વાંધો નહીં. મને તો એ ગમે છે.'

બોલવંુ સહેલું છે. જો ખરેખર કોઈ વાંધા જ ન હતો તો એમનાં લગ્નજીવનમાં ભંગાણ ન પડત. નિતનવી અફવાઓ સંભળાય છે. અમૃતા સાથે છેડો ફાડીને સૈફ એની ઈટાલિયન ગર્લફ્રેન્ડ રોસા સાથે રહેવા લાગ્યો છે, વગેરે. જોકે મગનું નામ મરી પાડવા કોઈ પાર્ટી તૈયાર નથી. 

૨૦૦૪માં સૈફ ઘાંઘો થઈને કહે છેઃ 'મારી અંગત વાતો મીડિયા પાસે શી રીતે પહોંચી જાય છે? નક્કી મારા દોઢડાહ્યા દોસ્તો જ વટાણા વેરી નાખે છે. હું સખત અપસેટ છું. હા હા, હું અમૃતાના ટચમાં છું જ. એને રોજ ફોન કરું છું. મને સખત માન છે અમૃતા માટે... અને મારાં વહાલાં બચ્ચાંઓને હું કેવી રીતે ભુલી શકું? હું કોશિશ કરું છું કે બધું ઠીક થઈ જાય.'

જો કજોડું તૂટે એ ઠીક થયું એમ કહેવાતું હોય તો હા, ૨૦૦૪માં બધું ઠીક થઈ ગયંુ. સૈફ-અમૃતા કાયદેસર રીતે નોખાં થઈ ગયાં. જાણે ડિવોર્સ ફળ્યા હોય તેમ સૈફની ગાડી ટોપ ગિઅરમાં આવી જાય છે. 'એક હસીના થી', 'હમ તુમ', 'પરિણીતા', 'સલામ નમસ્તે', 'ઓમકારા'...   આ બધી મજાની ફિલ્મો છે. 'કલ હો ના હો' ડિવોર્સના એક વર્ષ પહેલાં જ આવી ગઈ હતી.  સૈફ ઈન્ડસ્ટ્રીનો ચોથો મજબૂત ખાન ગણાવા લાગે છે. ઈટાલિયન કન્યા સાથેનો એનો સંબંધ ત્રણ વર્ષ ચાલે છે. ૨૦૦૭ના ઉત્તરાર્ધમાં કરીના કપૂર એના  જીવનમાં પ્રવેશે છે. 

મે ૨૦૦૮માં સૈફ કહે છેઃ 'સવારે મારી આંખ ખૂલે અને મને ભાન થાય કે હું હજુ જીવું છું! આ મુક્તિનો અહેસાસ બહુ મજાનો હોય છે. હું મારાં સંતાનો પ્રત્યે ખૂબ જવાબદાર છું અને છતાંય પૂરેપૂરો આઝાદ પણ છું! પ્રેમની લાગણી સિવાય મને બીજંુ કશું જ બાંધી ન શકે.'

એક મૈં ઔર એક તૂ

ઓક્ટોબર ૨૦૦૯માં સૈફ-કરીના જાહેરમાં એકરાર કરે છે કે યેસ્સ, વી આર ઈન અ રિલેશનશિપ. તેઓ મીડિયાને પોતાનાં અંગત જીવનની કહેવા જેવી અને ન કહેવા જેવી બધ્ધી વાતો કરતાં રહે છે. મીડિયાને જલસો પડી જાય છે.

સૈફ કહે છેઃ 'મારા માટે મહત્ત્વનું એ છે કે એક અદાકાર તરીકે હું સારો ગણાઉં, મારા સહકલાકારોને મારા માટે આદર હોય અને નિર્માતાઓ મારા પર આધાર રાખી શકતા હોય. પ્રસિદ્ધિ મારા માટે એટલી બધી ઈમ્પોર્ટન્ટ નથી. કાલે ઉઠીને કોઈ મારો ઓટોગ્રાફ લેવા ન આવે તો મારા પેટનું પાણી પણ નહીં હલે.' 

મસ્તમજાની 'લવ આજકલ' અને ફ્લોપ 'કુરબાન' પછીના પોણાત્રણ વર્ષમાં સૈફની ગણીને ત્રણ જ ફિલ્મો આવે છે, 'આરક્ષણ', 'એજન્ટ વિનોદ' અને લેટેસ્ટ 'કોકટેલ'. સૈફ આ ત્રણમાંની છેલ્લી બન્ને ફિલ્મોનો પ્રોડયુસર પણ છે. ૨૦૧૨માં ૪૨ વર્ષનો સૈફ પોતાના કરતાં દસ વર્ષ નાની કરીના સાથે વિધિવત્ લગ્ન કરે છે. 

લગ્નના થોડા મહિના પહેલાં એક ઈન્ટવ્યુમાં સૈફ કહે છેઃ 'હા, અમારાં લગ્ન થવાનાં છે એ વાત સાચી, પણ એમાં એક્સાઈટ થવા જેવું શું છે? હું કંઈ અઢાર વર્ષનો કીકલો થોડો છું? હું અને કરીના છેલ્લાં કેટલાય વખતથી સાથે જ છીએને. મને તો ગુપચુપ પરણી જવાનું મન થાય છે. મેરેજ પછી જાહેરાત કરી દેવાની, કારણ કે ધામધૂમ કરવા જઈશું તો મેનેજ કરવું અઘરું થઈ પડશે અને ટેન્શનનો પાર નહીં રહે. આવડી મોટી ઈન્ડસ્ટ્રીમાંથી કોને લગ્નમાં બોલાવવા ને કોને કાપવા? હજુ તો જગ્યા ય નક્કી નથી થઈ. 

લેટ્સ સી.'

સૈફની કરીઅર આગળ વધતી રહે છે. ઓછી હિટ અને વધારે ફ્લોપ ફિલ્મો આવતી રહે છે. સૈફ-કરીના બે રૂપકડા દીકરાઓનાં મા-બાપ બને છે. તેઓ એક સરસ, પિક્ચર-પરફેક્ટ કપલ હોય તેવું ચિત્ર જાહેરમાં ઉપસતું રહે છે... ને ૨૦૨૫ના પહેલા જ મહિનામાં કોઈ અજાણ્યો માણસ સૈફના ઘરમાં ઘુસીને ચાકુથી એના પર હુમલો કરે છે ને જાણે કે સૈફની સાથે સાથે પેલું 'પરફેક્ટ કપલ'વાળી છાપ પણ ઘાયલ થઈ જાય છે. અલબત્ત, પતિ-પત્ની વચ્ચે એક્ઝેટલી શું ચાલી રહ્યું છે તેના વિશે એ બે સિવાય ત્રીજું કોઈ અધિકારપૂર્વક કહી ન શકે. આપણા અધિકારક્ષેત્રમાં માત્ર આટલું છેઃ સૈફની અને એના લગ્નસંબંધની તબિયત ચુસ્તદુરસ્ત રહે એવી શુભેચ્છા આપવી, બસ.