SOCIAL સર્કલ .

આને કહેવાય યાદગાર કોલોબોરેશન!

તમે શ્રેયા ઘોષાલ અને સુનિધિ ચૌહાણે ગાયેલા ધમાકેદાર 'છૈલા' ગીતનો વીડિયો જોયો કે નહીં? આહા, તમારું શરીર આપોઆપ ઝુમવા લાગશે ને દિલ બાગ બાગ થઈ જશે! સોશિયલ મીડિયા અત્યારે 'છૈલા'ની તસવીરો, રીલ્સ અને વીડિયોઝથી છલકાઈ રહ્યું છે. શ્રેયા અને સુનિધિ બન્ને ભારતની શ્રેષ્ઠતમ ગાયિકાઓમાં સ્થાન પામે છે. બન્નેની શૈલી એકમેક કરતાં સાવ ભિન્ન છે. સુનિધિના અવાજમાં ગજબનો પાવર છે, એક વેસ્ટર્ન અંદાજ છે, જ્યારે શ્રૈયા ગાય એટલે જાણે કાનમાં મધ રેડાતું હોય તેવું લાગે. શ્રેયાનો ક્લાસિકલ બેઝ  જબરદસ્ત. આ બન્નેએ ફિલ્મોમાં ત્રણેક ગીતો સાથે ગાયાં છે ખરાં, પણ  આ વખતે સલીમ-સુલેમાને સાચા અર્થમાં તેમને એકઠાં કર્યાં અને એમના 'ભૂમિ' નામના નોન-ફિલ્મી વાર્ષિક આલ્બમના ભાગરૂપે 'છૈલા' નામનું મસ્તીભર્યું ગીત ગવડાવ્યું. ગીત યુટયુબ પર લોન્ચ થતાં જ ટ્રેન્ડ થવા લાગ્યું. ભારતીય તો ઠીક, અમેરિકન ને આફ્રિકન સંગીતરસિયાઓએ પણ ધડાધડ તેના રિએક્શન વીડિયો બનાવી નાખ્યા. સુપર્બ ગીત છે. શ્રેયા અને સુનિધિના કોમ્બિનેશન પાસેથી આવી જ અપેક્ષા હોય. ગીત આમ તો સુનિધિને સુટ થાય તેવું વધારે છે, પણ શ્રેયાએ પણ શું કમાલ કરી છે! ખાસ કરીને ગીતના છેલ્લે આવતા રૅપિંગવાળા ટુકડામાં. આ ગીતની સિક્વલ પણ આવી છે, જેમાં શ્રેયા અને સુનિધિ સાથે એમના કોમન છૈલાના રૂપમાં ટાઇગર શ્રોફ ઝુમતો-ગાતો દેખાય છે. અદભુત! આ ગીત તમે એક વાર જોશો તો તેને લૂપમાં સાંભળ્યા વિના નહીં રહી શકો. લિખ લો!

સાસ-બહૂ કી જોડી

કરવા ચોથ આવી નથી ને હિન્દી ફિલ્મની હિરોઈનોએ મસ્ત સજીધજીને પોતપોતાના પતિઓ માટે સેલિબ્રેશન કર્યું નથી. આ જુઓ હરખપદુડી શ્રીમતી કેટરીના વિકી કૌશલ, પોતાની અસલી સાસુમા સાથે. કેટરીનાએ સોશિયલ મીડિયા પર શેર કરેલી તસવીર પરથી તો લાગે છે કે એને સાસુમા સાથે બહુ બને છે. આશા રાખીએ કે વાસ્તવમાં પણ બન્ને વચ્ચે મીઠા સંબંધ જ હોય. બીજી તસવીરમાં આખો કૌશલ પરિવાર ખુશખુશાલ ઊભો છે. વિકીનો નાનો ભાઈ સની હજુ સુધી સિંગલ છે. એકાદ-બે વર્ષ પછીની કરવા ચોથની તસવીરમાં મોટે ભાગે કેટરીનાની દેરાણી પણ ઉમેરાઈ ગઈ હશે. જોઈએ, સની કૌશલ પોતાની હસીન દિલરૂબા ક્યારે શોધે છે. 

બોબીની દિશા દક્ષિણ તરફ....

'એનિમલ' ફિલ્મ બોબી દેઓલને ગજબની ફળી છે. તાજેતરમાં એ અને દિશા પટણી સ્ટાઇલો મારતાં મારતાં દિલ્હી એરપોર્ટ પર પહોંચી ગયાં હતાં. શા માટે? આ બન્નેની 'કંગુઆ' નામની કન્નડ ફિલ્મ આવી રહી છે, જેની પ્રમોશનલ ઇવેન્ટમાં ભાગ લેવા માટે તેઓ દિલ્હી આવ્યાં હતાં. ફિલ્મનો મેઇન હીરો સુરીયા છે, હિરોઈન દિશા છે અને વિલન અફ કોર્સ, આપણા બોબીકુમાર છે. દિશા ગજબની સુંદર લાગે છે આ તસવીરમાં, નહીં? તો સર્વાનુમતે આપણે 'ધ બેસ્ટ બોડી ઇન ધ બિઝનેસ'નો અવોર્ડ દિશાને આપી દઈએ?