SOCIAL સર્કલ .

રાહા બે વર્ષની થઈ

દિવસો ક્યાં વહી જાય છે તેની ક્યાં ખબર પડે છે, નહીં? જુઓને, હજુ હમણાં આલિયા પ્રેગનન્ટ છે એવા ન્યુઝ આવ્યા હતા ને લો, જોતજોતામાં આલિયાની બેબલી રાહા બે વર્ષની થઈ ગઈ. રાહાના બર્થડે પર આલિયાએ એક મસ્ત ફોટો સોશિયલ મીડિયા પર શેર કર્યો હતો. એમાં એ, રણબીર અને ટબુકડી રાહા એક વૃક્ષના થડને વળગીને ઊભાં છે. આલિયા લખે છે: 'સમટાઇમ્સ ઓલ યુ નીડ ઇઝ અ જાયન્ટ હગ... એન્ડ યુ મેક લાઇફ ફીલ લાઇક વન...' વાહ. ક્યુટ ક્યુટ રાહા આજકાલ રણબીર કપૂરને શું કહીને બોલાવે છે, ખબર છે? 'પાપા ભટ્ટ'! સ્વીટ!

સ્વર્ગ સે સુંદર 

રોજ-બ-રોજની ભાગદોડભરી જિંદગીમાંથી બ્રેક લેવા અને તન-મનને રિચાર્જ કરવા લેવા માટે તમે ક્યાં જવાનું પસંદ કરો છો - ગોવા, કેરળ, મનાલી? આ સવાલ તમે કેટરિના કૈફને પૂછશો તો એ એક સેકન્ડનો વિચાર કર્યા વગર જવાબ આપશે- ઓસ્ટ્રિયામાં આવેલા માયરલાઇફ હેલ્થ રિસોર્ટ! સ્વર્ગ જેવી જગ્યાએ ઊભેલું આ હેલ્થ રિસોર્ટ દુનિયાભરના સેલિબ્રિટીઓનું ફેવરિટ સ્થળ છે. સ્ક્રીનસેવર જેવા અતિ રમણીય દેખાતા આ સ્થળના ફોટા કેટરિનાએ હોંશે હોંશે શેર કર્યા છે. જોઈએ, તાજીમાજી થઈને મુંબઈ પાછા ફર્યા બાદ કેટરિના કેમેરા સામે અભિનયનાં કેવાંક અજવાળાં પાથરે છે. 

તૃપ્તિનો તરખાટ 

આજકાલ તૃપ્તિ ડિમરી સતત ન્યુઝમાં રહે છે. 'વિકી વિદ્યા કા વો વાલા વીડિયો' નામની એની લેટેસ્ટ ફિલ્મને મિશ્ર પ્રતિક્રિયાઓ મળી છે. તૃપ્તિ જે રીતે એની ફિલ્મોમાં બિન્ધાસ્તપણે રોમેન્ટિક દ્રશ્યો આપે છે એને કારણે અમુક વાંકદેખાઓ એની ખૂબ ટીકા કરે છે. આ ટ્રોલિયાઓએ તૃપ્તિની 'બુલબુલ' અને 'કલા' જેવી ફાંકડી ફિલ્મો - કે જેમાં એણે સહેજ પણ અંગપ્રદર્શન કર્યું નથી - એનાં નામ પણ સાંભળ્યાં છે ખરા? ખેર, તૃપ્તિ માત્ર વેસ્ટર્ન વસ્ત્રોમાં જ નહીં, સાડીમાં પણ ભારે ગ્લેમરસ લાગે છે. ખાતરી ન થતી હોય તો જોઈ લો સોશિયલ મીડિયા પર શેર થયેલી એની લેટેસ્ટ તસવીરો.