રૂપિયામાં તીવ્ર કડાકો: નીચામાં રૂ.87.25નું તળિયું દેખાયુ

- દેશમાંથી ડોલરનો આઉટફલો વધતાં તથા ઈમ્પોર્ટરો ડોલર ખરીદવા નિકળતાં

- બ્રિટીશ પાઉન્ડ ઉછળી રૂ.110 પાર કરી ગયો: યુરોએ  રૂ.91ની સપાટી કુદાવી: રિઝર્વ  બેન્ક હવે ડોલર વેંચવા નિકળશે એવી ચર્ચાતી વાતો

મુંબઈ : મુંબઈ કરન્સી બજારમાં  આજે રૂપિયા સામે ડોલરના ભાવ  સ્પ્રિંગની જેમ ઉછળી રૂ.૮૭ની સપાટી કુદાવી ગયા હતા. ડોલર ઉછળતાં  રૂપિયો નવા નીચા તળિયે ઉતરી ગયો હતો. ડોલરનાભાવ રૂ.૮૬.૭૧ વાળા આજે સવારે રૂ.૮૬.૮૬ ખુલ્યા પછી નીચામાં ભાવ રૂ.૮૬.૮૫ થઈ ત્યારબાદ ભાવ ઉછળી ઉંચામાં રૂ.૮૭ પાર કરી રૂ.૮૭.૨૫ સુધી ઉંચકાઈ છેલ્લે બંધ ભાવ રૂ.૮૭.૧૯ રહ્યા હતા.  ડોલરના ભાવ ૪૮ પૈસા વધી જતાં રૂપિયો આજે ૦.૫૫ ટકા ગબડયો હતો. દેશમાંથી ડોલરનો આઉટફલો વધી રહ્યાના વાવડ વચ્ચે રૂપિયા પર દબાણ વધ્યાનું બજારના જાણકારોએ જણાવ્યું હતું.  મહિનાનો  અંત નજીક હોતાં આજે ડોલરમાં ખાસ કરીને આયાતકારોની લેવાલી વિશેષ જોવા મળી હતી. અમેરિકાના પ્રમુખ ટ્રમ્પ દ્વારા છાશવારે ટેરીફ-ટેરીફનું ગાણું ગવાતું રહેતાં દેશ-વિદેશના કરન્સી બજારોમાં તાજેતરમાં વ્યાપક ઉથલપાથલ જોવા મળી છે.વાયદા બજારમાં નજીકની ડિલીવરીમાં એક્સપાયરી નજીક આવતાં વેચાણો કાપવાના સ્વરૂપમાં પણ ડોલરમાં લેવાલી વધ્યાની૪ ચર્ચા હતી. ડોલરના ભાવ ઝડપી ઉછળતાં હવે રિઝર્વ બેન્ક સરકારી બેન્કો મારફત કદાચ બજારમાં ડોલર વેંચવા આવશે એવી શક્યતા  પણ જામકારો બતાવી રહ્યા હતા. ડોલરના ભાવ નજીકના દિવસોમાં ઉંચામાં ૮૭.૪૦ તથા નીચામાં ૮૬.૮૫ વચ્ચે રહ્યાનો અંદાજ જાણકારો બતાવી રહ્યા હતા.  ડોલરના ભાવ આજે ઝડપી વધતાં રૂપિયામાં એક દિવસીય કડાકામાં પાછલા ૩ સપ્તાહનો રેકોર્ડ તુટયો હતો. આયાતકારોનું હેજીંગ તથા એનડીએફની એક્સપાયરીની અસર પણ કરન્સી બજારમાં રૂપિયા પર નેગેટીવ જોવા મળી હતી.  રૂપિયો તૂટતાં દેશમાં આયાત થતી સોના-ચાંદી તથા ક્રૂડતેલ સહિતની વિવિધ ચીજોની ઈમ્પોર્ટ કોસ્ટ વધતાં હવે ફુગાવો તથા મોંઘવારી વધુ લવધવાની ભીતિ જાણકારો બતાવી રહ્યા હતા.આ પૂર્વે સરકાર દ્વારા આયાતકારો માટે ડોલરના કસ્ટમ એક્સચેન્જના દર ઘટાડવામાં  આવ્યા હતા અને તેના પગલે વિવિધ આયાતી ચીજોની ઈફેકટીવ ઈમ્પોર્ટ ડયુટી ઘટી હતી. અને હવે પ્રવાહો પલ્ટાયા છે.  દરમિયાન, વિશ્વ બજારમાં ડોલરનો વૈશ્વિક ઈન્ડેક્સ આજે નીચામાં ૧૦૬.૫૬ તથા ઉંચામાં ૧૦૬.૭૯ થઈ ૧૦૬.૬૫ રહ્યાના નિર્દેશો હતા. 

મુંબઈ બજારમાં બ્રિટીશ પાઉન્ડના ભાવ બાવન પૈસા વધી ઉંચામાં ભાવ રૂ.૧૧૦ પાર કરી રૂ.૧૧૦.૧૭ થઈ છેલ્લે ભાવ રૂ.૧૧૦.૧૦ રહ્યા હતા. યુરોપીયુન કરન્સી યુરોના ભાવ  ૫૫ પૈસા વધી ઉંચામાં રૂ.૯૧.૩૭ થઈ છેલ્લે ભાવ રૂ.૯૧.૩૫ રહ્યા હતા. જાપાનની કરન્સી ૦.૬૯ ટકા વધી હતી જ્યારે ચીનની કરન્સી રૂપિયા સામે ૦.૩૭ ટકા પ્લસમાં રહી હતી. આ પૂર્વે સરકરે ૨૧મી ફેબ્રુઆરી અમલમાં આવે એ રીતે આયાતકારો માટે ડોલર કસ્ટમ એક્સચેન્જના દર રૂ.૮૮.૪૦થી ઘટાડી રૂ.૮૭.૭૫ કર્યા હતા અને હવે ખુલ્લા બજારમાં  રૂપિયો તૂટતાં સરકાર આયાતકારો માટે ડોલરના કસ્ટમ એક્સચેન્જના દર ફરી વધારશે એવી શક્યતા બજારમાં ચર્ચાઈ રહી હતી.

ફોરેક્સ ભાવ

ડોલર રૂ ૮૭.૧૯

પાઉન્ડ રૂ ૧૧૦.૧૦

યુરો રૂ ૯૧.૩૫

યેન રૂ ૦.૫૮