આધાર કાર્ડ પર ફોટો બરાબર નથી? બદલાવવા માટે આટલું કરો, જાણો કેટલો થશે ખર્ચ

Aadhaar Card Updates: તમારે બેન્ક ખાતું ખોલાવવું હોય કે પછી કોઈ સરકારી યોજનાનો લાભ લેવો હોય, આ બધા માટે આધાર કાર્ડ સૌથી મહત્વપૂર્ણ બની ગયું છે. આજના સમયમાં, આધારનો ઉપયોગ માત્ર મહત્વના હેતુઓ માટે જ નથી થતો પરંતુ તે તમારી ઓળખનો સૌથી મહત્વપૂર્ણ દસ્તાવેજ બની ગયો છે. પરંતુ તેમાં કેટલાક અપડેટ્સ કરાવવા માગતા હોવ તો તમે સરળતાથી કરાવી શકો છો. જો તમે આધાર પર દર્શાવેલો તમારો ફોટો સરળતાથી બદલવા માગતા હોવ તો આ પગલાંઓ અનુસરી શકો છો.

આધાર કાર્ડમાં તમારો મહત્વપૂર્ણ ડેટા

આધાર કાર્ડમાં કાર્ડધારકનો બાયોમેટ્રિક અને ડેમોગ્રાફિક ડેટા છે. આના દ્વારા, આધાર કાર્ડનો ઉપયોગ કરનાર વ્યક્તિની ઓળખ તરત જ ચકાસી લેવામાં આવે છે. તેને જારી કરનાર સંસ્થા UIDAIએ તેમાં કેટલીક વસ્તુઓ બદલવાની સુવિધા આપી છે. આમાંથી એક ફોટો અપડેટ કરવાનો છે. આ સિવાય ઘરના સરનામાથી લઈને ફોન નંબરમાં પણ ફેરફાર કરી શકાય છે.

આધાર કેન્દ્ર પર જઈને કરો આ કામ

જો આપણે માત્ર ફોટો બદલવાની વાત કરીએ તો આ કામ તમે ઘરે બેસીને કરી શકશો નહીં, કારણ કે ફોટો અપડેટની સેવા ઓનલાઈન ઉપલબ્ધ નથી. જો કે, UIDAIની સત્તાવાર વેબસાઇટ (uidai.gov.in) પર લોગ ઇન કરીને તમે ફોર્મ ડાઉનલોડ કરી શકો છો અને તેને ભરી શકો છો અને નજીકના આધાર સેવા કેન્દ્રની મુલાકાત લઈને સબમિટ કરી શકો છો. આનાથી કેન્દ્ર પર ફોર્મ ભરવામાં લાગતો સમય ઘટશે. તમે તમારા મોબાઇલ અથવા લેપટોપ પર વેબસાઇટ ખોલો. આ પછી તમે માય આધાર વિકલ્પ પર જાઓ. અહીં તમારે ડાઉનલોડ વિભાગમાં જવું પડશે અને આધાર એનરોલમેન્ટ/અપડેટ ફોર્મ પર ક્લિક કરવું પડશે.

ITR: આવકવેરા સંબંધિત આ કામ અગાઉથી કરો, જેથી રિટર્ન ફાઈલ કર્યા બાદ રિફંડ ઝડપથી સીધુ ખાતામાં જમા થાય

ફોર્મમાં જરૂરી તમામ માહિતી ભર્યા પછી, તમારા નજીકના આધાર નોંધણી કેન્દ્ર પર જાઓ અને તેને સબમિટ કરો. આધાર એક્ઝિક્યુટિવ બાયોમેટ્રિક વેરિફિકેશન દ્વારા તમારી બધી માહિતીની પુષ્ટિ કરશે. ત્યારબાદ તમારો નવો ફોટો ક્લિક થશે, જે આધાર કાર્ડમાં અપડેટ થશે.

આધારની આ સેવા મફત નથી

આધાર કાર્ડમાં ફોટો અપડેટ કરવાની આ સેવા મફત નથી, પરંતુ આ કામ માટે તમારે 100 રૂપિયા ફી ચૂકવવી પડશે અને તેના પર GST ચાર્જ પણ લાગશે. ફોટો અપડેટ કર્યા પછી, આધાર એક્ઝિક્યુટિવ તમને એક સ્લિપ અને યુનિક રિક્વેસ્ટ નંબર (URN) આપશે. આના દ્વારા તમે અધિકૃત વેબસાઇટ પરથી આધારનું લેટેસ્ટ સ્ટેટસ ટ્રૅક કરી શકો છો. પ્રક્રિયા પૂર્ણ થયા પછી, તમે નજીકના આધાર સેવા કેન્દ્રની મુલાકાત લઈને તમારું આધાર કાર્ડ પ્રિન્ટ કરાવી શકો છો. તમે UIDAIની સત્તાવાર વેબસાઇટ પરથી અપડેટ કરેલ આધારની ઇ-આધાર કોપી પણ ડાઉનલોડ કરી શકો છો.

અપડેટેડ ઈ-આધાર કેવી રીતે ડાઉનલોડ કરવું

• www.uidai.gov.in પર જાઓ અને આધાર ડાઉનલોડ કરો પર ક્લિક કરો.
• નવા પેજ પર, આધાર નંબર અથવા એનરોલમેન્ટ આઈડી અથવા વર્ચ્યુઅલ આઈડી દાખલ કરો.
• કેપ્ચા કોડ સબમિટ કરો અને Send OTP વિકલ્પ પર ક્લિક કરો.
• વન ટાઈમ પાસવર્ડ (OTP) તમારા રજિસ્ટર્ડ મોબાઈલ નંબર પર મોકલવામાં આવશે.
• આ OTP દાખલ કરો, વેરીફાઈ અને ડાઉનલોડ પર ક્લિક કરો.
• આ રીતે તમારું અપડેટેડ ફોટો સાથેનું ઈ-આધાર ડાઉનલોડ થઈ જશે