ભારતીય શેરબજારમાં વિદેશી રોકાણકારોનો વિશ્વાસ વધ્યો, એક અઠવાડિયામાં કર્યું રૂ.4800 કરોડનું રોકાણ

FPI Investment: વર્ષ 2024ના પ્રથમ અઠવાડિયે દેશમાં વિદેશી રોકાણ આવવાનો ટ્રેન્ડ યથાવત છે. વિદેશી રોકાણકારોમાં વર્ષ 2023થી ભારતીય અર્થવ્યવસ્થાને લઈને ઉત્સાહ છે. હવે 2024માં પણ આવો જ માહોલ જોવા મળી રહ્યો છે. નવા વર્ષમાં પણ ભારતીય શેરબજારોમાં વિદેશી પોર્ટફોલિયો ઈન્વેસ્ટર્સ (FPI) ખરીદવાની પ્રક્રિયા ચાલુ છે. ઝડપથી વિકસતી અર્થવ્યવસ્થા વિશેની અપેક્ષાઓને કારણે એફપીઆઈએ જાન્યુઆરીના પ્રથમ અઠવાડિયામાં શેરબજારોમાં આશરે રૂપિયા 4,800 કરોડનું રોકાણ કર્યું છે.

લોન અને બોન્ડ માર્કેટમાં પણ 4,000 કરોડનું રોકાણ

ડિપોઝિટરી આંકડા અનુસાર, આ સમયગાળા દરમિયાન FPIએ લોન અને બોન્ડ માર્કેટમાં  4,000 કરોડ રૂપિયાનું રોકાણ પણ કર્યું છે. જિયોજિત ફાઈનાન્શિયલ સર્વિસિસના મુખ્ય રોકાણ વ્યૂહરચનાકાર વીકે વિજય કુમારે જણાવ્યું હતું કે 2024માં અમેરિકામાં વ્યાજદરમાં લાંબા સમય સુધી ઘટાડો થવાની ધારણા છે. આ કારણે FPI તેમની ખરીદી વધુ વધારશે. દેશમાં ટૂંક સમયમાં સામાન્ય ચૂંટણીઓ યોજાવા જઈ રહી છે. આ ચૂંટણી પહેલાના થોડા મહિનાઓમાં FPI રોકાણ વધશે એવી અપેક્ષા છે.

FPIએ ડિસેમ્બરમાં 66,134 કરોડ રૂપિયા શેરમાં મૂક્યા હતા

આ સિવાય લોન માર્કેટમાં એફપીઆઈની સંખ્યા પણ 2024માં સારી રહેવાની ધારણા છે. અહેવાલ અનુસાર, વિદેશી પોર્ટફોલિયો રોકાણકારોએ આ મહિને (5 જાન્યુઆરી સુધી) ભારતીય શેરોમાં 4,773 કરોડ રૂપિયા રોકાણ કર્યું છે. FPIએ ડિસેમ્બરમાં શેરમાં 66,134 કરોડ અને નવેમ્બરમાં 9,000 કરોડ રૂપિયાનું રોકાણ કર્યું હતું.