પાંચ SME IPOને રૂ. 65,000 કરોડથી વધુની બિડ મળી

અમદાવાદ : નાના અને મધ્યમ ઉદ્યોગો (એસએમઈ) ના આઈપીઓને લઈને અભૂતપૂર્વ ઉન્માદ છે અને રોકાણકારો તેનો એક ભાગ બનવાનો દાવો કરી રહ્યા છે. આ વર્ષે સૌથી વધુ સક્રિય પાંચ એસએમઈ આઈપીઓને રૂ. ૬૫,૦૦૦ કરોડથી વધુની કુલ બિડ મળી હતી, જ્યારે આ કંપનીઓ માત્ર રૂ. ૫૯.૩ કરોડ એકત્ર કરવા માટે બજારમાં આવી હતી, જેનો અર્થ છે કે તેમને ૧૧૦૦ ગણાથી વધુ બિડ મળી હતી.

૧૦ સૌથી વધુ સબ્સ્ક્રાઇબ થયેલા એસએમઈ આઈપીઓને ૭૩૩ વખતથી ૨,૦૧૪ વખત સુધીના સબસ્ક્રિપ્શન મળ્યા હતા. આ આઈપીઓ ડિસેમ્બરથી અત્યાર સુધીના છે. લિસ્ટિંગના પ્રથમ દિવસે સૌથી ઓછો ફાયદો ૩૫ ટકા જેટલો હતો જ્યારે GP ઈકો સોલ્યુશન્સના શેરમાં ૩૯૪ ટકાનો જંગી વધારો નોંધાયો હતો. 

એક ઇન્વેસ્ટમેન્ટ બેન્કરે જણાવ્યું હતું કે જ્યારે રૂ. ૧૦ કરોડના આઈપીઓ માટે રૂ. ૧૦,૦૦૦ કરોડની બિડ આવે છે, તો તેનો અર્થ એ નથી કે કંપની રૂ. ૧૦,૦૦૦ કરોડ એકત્ર કરી શકે છે. આ માત્ર એક સંકેત છે કે રોકાણકારો તેની પાછળ દોડી રહ્યા છે. એવું કહી શકાય કે રોકાણકારો ગ્રે માર્કેટ પ્રીમિયમને ધ્યાનમાં રાખીને આ માટે અરજી કરી રહ્યા છે. એસએમઈ આઈપીઓની ભારે માંગ એવા સમયે જોવા મળી રહી છે જ્યારે મુખ્ય પ્લેટફોર્મ માટે આઈપીઓની કોઈ અછત નથી. 

માર્કેટ રેગ્યુલેટરે કેટલાક એસએમઈ સામે ભંડોળના દુરુપયોગ, પ્રમોટરોની અનિયમિતતા અને બનાવટી નાણાકીય નિવેદનો માટે પ્રતિબંધો લાદ્યા છે. તેમ છતાં એસએમઈ આઈપીઓ અંગે રોકાણકારોનું મનોબળ ઘટયું નથી. વધુ દેવું અથવા ખાનગી રોકાણકારો પાસેથી નાણાં એકત્ર કરવાનો પ્રયાસ કરવાને બદલે, લિસ્ટેડ બજારો વધુ સારા છે. 

જુલાઈમાં એનએસઈ પર એસએમઈ આઈપીઓ દ્વારા એકત્ર કરાયેલી રકમ મુખ્ય પ્લેટફોર્મ પરના લગભગ પાંચમા ભાગની હતી. એનએસઈ ઇમર્જ પર ૨૨ એસએમઈ આઈપીઓ દ્વારા રૂ. ૧,૦૩૦ કરોડ એકત્ર કરવામાં આવ્યા હતા. બીએસઈ એસએમઈ પ્લેટફોર્મના ડેટા અનુસાર, કુલ ૧૮૫ એસએમઈ હવે મુખ્ય પ્લેટફોર્મ પર છે. બીએસઈ એસએમઈ પર કંપનીઓની કુલ માર્કેટ મૂડી રૂ. ૬૭,૯૫૮ કરોડ છે.

NSEએ IPO માટે સેબી પાસે NOC માંગ્યું

હીરો મોટર્સ અને સ્વિગીની સાથે હવે એલજી ઈલેક્ટ્રોનિક્સ અને એનએસઈ પર આઈપીઓની હરોળમાં આવી ગયા છે. ૮ વર્ષ અગાઉ ૨૦૧૬માં પ્રથમ વખત જાહેર ભરણા માટે બજાર નિયામક પાસે અરજી કર્યા બાદ હવે ફરી તેનો આઈપીઓ ચર્ચામાં છે.એલજી ઈલેક્ટ્રોનિક્સ આઈપીઓ દ્વારા ભંડોળ એકત્ર કરવા પર પણ વિચારી રહી છે. દક્ષિણ કોરિયન કંપનીએ હજુ સુધી ભારતીય યુનિટના વેલ્યુએશન પર કામ કર્યું નથી. 

આ સિવાય ભારતના સૌથી મોટા એક્સચેન્જ એનએસઈએ પણ સેબી પાસે નો ઓબ્જેક્શન સર્ટિફિકેટ મેળવવા માટે અરજી સબમિટ કરી છે. મંગળવારે યોજાયેલી એજીએમમાં શેરધારકોને આ અંગે માહિતી આપી હતી.

આ અગાઉ એનએસઈના આઈપીઓનો પ્લાન ૨૦૧૬થી અટવાયેલો છે. ૨૦૧૬ની અરજી પર સેબીએ ૨૦૧૯માં ડીઆરએચપી પરત કરતા કહ્યું હતું કે કોલોકેશન કેસના નિરાકરણ પછી ફરીથી અરજી સબમિટ કરવી વધુ સારું રહેશે. જૂન ૨૦૨૨માં ફરી લિસ્ટિંગ માટે પરવાનગી માંગી હતી. એક મહિના બાદ જવાબમાં સેબીએ ટેક્નોલોજી, ઓપરેશન્સ, મોનિટરિંગ સહિતના અન્ય મુદ્દાઓને ટાંક્યા હતા.