ક્રેડિટ કાર્ડસનો ધરખમ ઉપયોગ ખર્ચમાં 27 ટકાનો વધારો થયો

- પોઈન્ટ ઓફ સેલ તથા ઓનલાઈન ખરીદી વધતા કાર્ડસના વપરાશમાં પણ વૃદ્ધિ 

મુંબઈ : નાણાં વર્ષ ૨૦૨૩-૨૪માં ક્રેડિટ કાર્ડસ મારફતના ખર્ચમાં વાર્ષિક ધોરણે ૨૭ ટકા વધારો થઈને તે રૂપિયા ૧૮.૨૬ ટ્રિલિયન રહ્યો છે. નાણાં વર્ષ ૨૦૨૨-૨૩માં આ આંક રૂપિયા ૧૪ ટ્રિલિયન રહ્યો હતો એમ રિઝર્વ બેન્કના આંકડા જણાવે છે. 

માર્ચ, ૨૦૨૪માં ક્રેડિટ કાર્ડસ મારફતનો ખર્ચ ૧૦ ટકાથી વધુ વધી રૂપિયા ૧.૬૪ ટ્રિલિયન રહ્યો હતો જે ફેબુ્રઆરીમાં રૂપિયા ૧.૪૯ ટ્રિલિયન જોવા મળ્યો હતો. તહેવારોની મોસમને પરિણામે તથા નાણાં વર્ષના અંતિમ મહિનાને કારણે માર્ચના ખર્ચમાં વધારો જોવા મળ્યો હતો. 

રૂપિયા ૧.૬૪ ટ્રિલિયનના ખર્ચમાંથી રૂપિયા ૬૦,૩૭૮ કરોડનો ખર્ચ પોઈન્ટ ઓફ સેલ ખાતે થયો હતો જે ફેબુ્રઆરીમાં રૂપિયા ૫૪૪૩૧.૪૮ કરોડ રહ્યો છે. ઈ-કોમર્સ પેમેન્ટસ રૂપિયા ૯૫૦૦૦ કરોડથી સાધારણ વધી રૂપિયા ૧.૦૫ ટ્રિલિયન રહ્યો હતો. માર્ચ ૨૦૨૩માં  ક્રેડિટ કાર્ડસ મારફત ઓનલાઈન ખર્ચનો આંક રૂપિયા ૮૬૩૯૦ કરોડ રહ્યો હતો. 

ફેબુ્રઆરીમાં રૂપિયા ૧૦.૦૬ કરોડની સરખામણીએ માર્ચના અંતે ક્રેડિટ કાર્ડસની સંખ્યા વધી ૧૦.૧૦ કરોડ રહી હતી. 

છેલ્લા પાંચ વર્ષમાં ક્રેડિટ કાર્ડની સંખ્યામાં નોંધપાત્ર વધારો જોવા મળ્યો છે. નાણાં વર્ષ ૨૦૨૦માં ૫.૭૭ કાર્ડસની સરખામણીએ નાણાં વર્ષ ૨૦૨૪ના અંતે કાર્ડસની સંખ્યા ૧૦ કરોડને પાર કરી ગઈ છે. આજરીતે કાર્ડસ પાછળનો ખર્ચ પણ પાંચ વર્ષમાં રૂપિયા ૭.૩૦ ટ્રિલિયન પરથી વધી રૂપિયા ૧૮.૩૦ ટ્રિલિયન પહોંચ્યો છે. 

નોટબંધી બાદ દેશમાં ડિજિટલ પેમેન્ટસ પદ્ધતિમાં વધારો થતાં કાર્ડસના ઉપયોગ પણ વધી ગયા છે. કાર્ડસ ઉપરાંત રોજબરોજના નાણાંકીય વ્યવહાર માટે ડિજિટલ પેમેન્ટસનો ઉપયોગ થઈ રહ્યાનું જોવા મળે છે. 

નાણાં વર્ષ ૨૦૨૨-૨૩ની સરખામણીએ  નાણાં વર્ષ ૨૦૨૩-૨૪માં  દેશમાં  યુનિફાઈડ પેમેન્ટ ઈન્ટરફેસ (યુપીઆઈ) વ્યવહારના વોલ્યુમમાં ૫૭ ટકા જ્યારે મૂલ્યની દ્રષ્ટિએ ૪૪ ટકા વધારો  થયો હોવાનું પ્રાપ્ત આંકડામાં અગાઉ જણાવાયું હતું.