આ દિવાળીએ સોના-ચાંદીની ખરીદી 30 ટકા સુધી ઘટી, અંદાજ કરતાં ઘરાકી અડધી રહી

Gold Silver Sales Down: સોના-ચાંદીના રેકોર્ડ ઊંચા ભાવોના કારણે આ વર્ષે ધનતેરસ અને દિવાળી નિમિત્તે કિંમતી ધાતુ બજારમાં માહોલ શુષ્ક રહ્યો છે. ધનતેરસના દિવસે સોના-ચાંદીની સરેરાશ ખરીદી ગતવર્ષની તુલનાએ 30 ટકા ઘટી છે. ઈન્ડિયન બુલિયન જ્વેલર્સ એસોસિએશન મુજબ, આ વર્ષે 35 ટન સોનુ વેચાયુ છે. જે ગતવર્ષે 42 ટન હતું. જો કે, ચાંદીના વેચાણ ગતવર્ષની તુલનાએ 30 ટકા વધ્યા છે.

કન્ફડરેશન ઓફ ઓલ ઈન્ડિયા ટ્રેડર્સે આ વર્ષે ધનતેરસે દેશભરમાં સોના-ચાંદીનો રૂ. 60 હજાર કરોડનો વેપાર થવાનો અંદાજ મૂક્યો હતો. જે દિવાળી સુધી વધી રૂ. 1 લાખ થવાની સંભાવના હતી. આ વખતે બે દિવસ સુધી ધનતેરસની ઊજવણી થઈ હોવા છતાં ઘરાકી અંદાજ કરતાં અડધાથી પણ વધુ ઓછી રહી છે.

ગઈકાલે સોનું ફરી નવી રેકોર્ડ ટોચે

અમદાવાદ બુલિયન બજારમાં ધનતેરસથી સોના-ચાંદીના ભાવમાં ઉછાળો જોવા મળ્યો છે. ગઈકાલે સોનું રૂ. 800 વધી રૂ. 82300 પ્રતિ 10 ગ્રામની નવી સર્વોચ્ચ ટોચે પહોંચ્યું હતું. ચાંદી  રૂ. 1500 ઉછળી રૂ. 99000 પ્રતિ કિગ્રા પર ક્વોટ થઈ રહી હતી. ધનતેરસથી અત્યારસુધીમાં સોનામાં રૂ. 1300 અને ચાંદીમાં રૂ. 2000નો ઉછાળો નોંધાઈ ચૂક્યો છે.

22500 કરોડની ખરીદી

આ વર્ષે સોના-ચાંદીના ઊંચા ભાવોના કારણે જથ્થાની દ્રષ્ટિએ વેચાણ ઘટ્યું છે. પરંતુ મૂલ્યની દ્રષ્ટિએ આંકડો નોંધનીય છે. આ વર્ષે ધનતેરસથી અત્યારસુધીમાં કુલ રૂ. 22500 કરોડના સોના-ચાંદી વેચાઈ ચૂક્યા છે. જેમાં એક દિવસમાં જ રૂ. 20 હજાર કરોડનું સોનુ ખરીદ્યુ છે.

આ પણ વાંચોઃ તહેવાર ટાણે જ સોનામાં આગ ઝરતી તેજી, 82300ની નવી ઓલટાઈમ હાઈ સપાટી બનાવી

ચાંદીમાં આકર્ષક તેજીના કારણે ખરીદી વધી

ચાંદી હાલમાં જ રૂ. 1 લાખ પ્રતિ કિગ્રાના સર્વોચ્ચ સ્તરે પહોંચી હતી. જેને ધ્યાનમાં લેતાં કોમોડિટી નિષ્ણાતોએ આગામી છ થી 12 માસમાં ચાંદી રૂ. 1.50 લાખ પ્રતિ કિગ્રાના લેવલે પહોંચવાનો આશાવાદ દર્શાવ્યો છે. આ તેજીના કારણે સોના કરતાં ચાંદીની માંગ 30 ટકા વધી છે. ધનતેરસના દિવસે રૂ.2500 કરોડની ચાંદી વેચાઈ હોવાનો અંદાજ છે.

ધનતેરસે આરબીઆઈએ પણ કરી ખરીદી

રિઝર્વ બેન્ક ઓફ ઈન્ડિયા (RBI)એ પણ ધનતેરસના અવસર પર લંડનથી 102 ટન સોનું ભારત શિફ્ટ કરી દીધું છે. સપ્ટેમ્બરના અંતમાં RBI પાસે કુલ 855 ટન સોનું હતું, જે પૈકી 510.5 ટન સોનું દેશમાં છે. બાકીનું સોનું ઈંગ્લેન્ડના ગોલ્ડ લોકરમાં સુરક્ષિત છે.