પેટલાદના માણેજ ગામે પીકઅપની ટક્કરે બાઈક સવાર યુવાનનું મોત

- વાસદ- તારાપુર હાઈવે પર અકસ્માત

- સોજીત્રાના રૂણજ ગામના બે મિત્રો ધર્મજનો આનંદમેળો માણીને પરત ફરી રહ્યા હતા

સોજીત્રા તાલુકાના રૂણજ ગામના ૨૧ વર્ષીય દેવ પંકજભાઈ પટેલ અને તેનો મિત્ર દેવલ દિનેશભાઈ પંચાલ રવિવારે બાઈક લઈને ધર્મજ ગામે યોજાયેલા આનંદ મેળમાં ગયા હતા. રાતે બંને મિત્રો મેળામાંથી પરત આવી રહ્યા હતા ત્યારે વાસદ તારાપુર હાઇવે ઉપર આવેલા પેટલાદ તાલુકાના માણેજ ગામની સીમમાં અજાણ્યા પીકઅપ ડાલાના ચાલકે બાઈકને જોરદાર ટક્કર મારતા સવાર બંને મિત્રો રોડ પર પટકાયા હતા. અકસ્માતમાં દેવલ પંચાલને માથા તેમજ શરીરના અન્ય ભાગોએ ગંભીર ઇજાઓ પહોંચતા તેનું ઘટના સ્થળે મોત નીપજ્યું હતું. જ્યારે દેવ પટેલને શરીરે વધતા ઓછા પ્રમાણમાં ઇજાઓ પહોંચી હતી. આ બનાવ અંગે દેવ પંકજભાઈ પટેલે પેટલાદ ગ્રામ્ય પોલીસ મથકમાં ફરિયાદ નોંધાવતા પોલીસે પીકઅપ ડાલાના ચાલક વિરુદ્ધ અકસ્માતનો ગુનો નોંધી કાયદેસરની કાર્યવાહી હાથ ધરી છે.