આંકલાવડી ગામે કાર ટ્રકની પાછળ ઘૂસી જતા 1 નું મોત, 4 ઘાયલ

- અમદાવાદ-વડોદરા એક્સપ્રેસ હાઈવે ફરી રક્તરંજિત બન્યો

- વડોદરાના પરિવારને અકસ્માત નડયો

આ બનાવ અંગે વાસદ પોલીસે અકસ્માતનો ગુનો નોંધી વધુ તપાસ હાથ ધરી છે.વડોદરા ખાતે રહેતા સમીરભાઈ દિલીપભાઈ વાલોડકરના માતા-પિતાને વિદેશ જવાનું હોઈ ગતરોજ તેઓ એક ફોરવ્હીલર ગાડીમાં પત્ની તથા બે બાળકો સહિતના પરિવારજનો સાથે અમદાવાદ એરપોર્ટ ખાતે ગયા હતા. 

તેઓની ગાડી મહંમદઐયુબ ઉસ્માનમીંયા શેખ હંકારી રહ્યા હતા. અમદાવાદથી રાત્રિના સુમારે પરત ફરતા હતા ત્યારે અમદાવાદ-વડોદરા એક્સપ્રેસ હાઈવે ઉપર આવેલ આંકલાવડી ગામની સીમમાંથી ગાડી પસાર થઈ રહી હતી ત્યારે ચાલકે પોતાનું વાહન પુરઝડપે હંકારતા આગળ જઈ રહેલ ટ્રકની પાછળના ભાગે ધડાકાભેર અથડાઈ હતી.

 આ અકસ્માતમાં ચાલક મહંમદઐયુબ ઉસ્માનમીંયા શેખને માથા તેમજ શરીરના અન્ય ભાગોએ ગંભીર ઈજાઓ પહોંચતા તેમનું ઘટનાસ્થળે જ કરૂણ મોત નીપજ્યું હતું. જ્યારે ગાડીમાં સવાર બે મહિલા સહિત ચાર વ્યક્તિ ઈજાગ્રસ્ત થઈ હતી.  અકસ્માતની જાણ એક્સપ્રેસ હાઈવે ઓથોરીટીને થતા ટીમ ઘટના સ્થળે દોડી આવી હતી અને અકસ્માતગ્રસ્ત વાહનમાંથી ઈજાગ્રસ્તોને બહાર કાઢી તુરંત જ સારવાર અર્થે વડોદરાની હોસ્પિટલમાં મોકલી આપ્યા હતા. આ બનાવ અંગે વાસદ પોલીસે ગાડીના ચાલક વિરૂધ્ધ ગુનો નોંધી કાયદેસરની કાર્યવાહી હાથ ધરી હતી.