ગુજરાતમાં RTEમાં હવે મધ્યમ વર્ગને પણ મળશે લાભ, રાજ્ય સરકાર લેશે મોટો નિર્ણય

RTE: રાઇટ ટુ એજ્યુકેશન હેઠળ સરકાર દ્વારા ગરીબ અને અનુસૂચિત જાતિ/ અનુસૂચિત જનજાતિના તેમજ જરૂરિયાતમંદ બાળકોને ખાનગી શાળામાં મફત શિક્ષણની સુવિધા પૂરી પાડવામાં આવે છે. જેમાં બાળકોની ફી સરકાર ચૂકવે છે. ત્યારે હવે RTE હેઠળ ફોર્મ ભરવા માટેની મુદતમાં 10 દિવસનો વધારો થઈ શકે છે. આ સિવાય RTE પ્રવેશમાં આવક મર્યાદા દોઢ લાખથી વધારીને 6 લાખ કરવાની વિચારણા છે. આ અંગે ખુદ શિક્ષણ મંત્રી પ્રફુલ પાનસેરિયાએ વાત કરી છે. જો કે, આવક મર્યાદા વધારવામાં આવે તો ગુજરાતમાં RTEમાં મધ્યમ વર્ગને પણ લાભ મળી શકે છે. શિક્ષણ મંત્રીએ જણાવ્યું હતું કે આ મુદ્દો હાલ વિચારણા હેઠળ છે જેમાં આગામી સમયમાં ચોક્કસ નિર્ણય લેવામાં આવી શકે છે. જણાવી દઈએ કે, RTE હેઠળ એડમિશન માટે ગ્રામ્ય વિસ્તારમાં 1.20 અને શહેરી વિસ્તારમાં 1.50 લાખની આવક મર્યાદા છે. હાલમાં ગુજરાત RTE વર્ષ 2025-26 એડમિશન ચાલુ છે, જેમાં એ બાળકની ઉંમર 3થી 6 વર્ષની છે એને BPL કેટેગરીમાં આવે છે. તેઓ અરજી કરી શકે છે.

RTE પ્રવેશમાં આવક મર્યાદામાં થઈ શકે છે વધારો

સુરતમાં શિક્ષણ મંત્રી પ્રફુલ પાનસેરિયાએ કહ્યું હતું કે, 'RTEમાં આવકની વિસંગતતા હતી. અન્ય બધી બાબતમાં 6 લાખની આવક મર્યાદા આપી રહ્યા છીએ. આવકના સુધારા માટે થોડો સમય આપીએ જેથી વધારાની આવકવાળા પણ તેનો લાભ લઈ શકે. અંદાજે 10 દિવસનો વધારાનો સમય આપવાની વિચારણા છે. ઘણા લોકોએ આવકના દાખલા કઢાવી લીધા છે. જે લોકોની વધુ આવક છે તેઓને પણ ફોર્મ ભરવાનો ચાન્સ મળે તે માટે સમય વધારવાની પણ વિચારણા છે. 6 લાખની આવક કરવાની વિચારણા છે. 99 ટકા નિર્ણય કરીશું.'

શિક્ષણ મંત્રીએ કહ્યું કે, 'સરકાર આ અંગે વિચારણા કરી રહી છે અને એક બે દિવસમાં નિર્ણય લઈ શકે છે. જો સરકાર નિર્ણય કરશે તો નવા દાખલા કઢાવવા માટે વાલીઓને વધારાના 10 દિવસનો સમય આપવામાં આવશે.'

હાલ ફોર્મ ભરવાની મુદતમાં દિવસનો વધારો કરાયો

RTE એડમિશન માટે ઓનલાઇન ફોર્મ ભરવાનો આજે અંતિમ દિવસ હતો. પરંતુ, સાઇટ ધીમી ચાલી રહી હોવાના કારણે ફોર્મ ભરવાની મુદતમાં હવે 4 દિવસનો વધારો કરવામાં આવ્યો છે. હવે 16 તારીખે રાત્રિના 12 વાગ્યા સુધી ઓનલાઇન અરજી કરી શકાશે.