બાજવામાં નશાકારક સીરપનું ગોડાઉન, 44000 બોટલ કબજે

વડોદરા,તા.15 ફેબ્રુઆરી 2024,ગુરૂવાર

વડોદરામાંથી સપ્લાય થયેલા નશાકારક સીરપના જથ્થા સાથેની રીક્ષા અમદાવાદ પોલીસે ઝડપી પાડ્યા બાદ વડોદરા પોલીસ દોડતી થઈ હતી અને ગઈ મોડી રાતે બાજવા વિસ્તારના ગોડાઉનમાં દરોડો પાડી સીરપનો જંગી જથ્થો ઝડપી પાડ્યો છે.

વડોદરાના સુભાનપુરા વિસ્તારમાં આવેલા ગોડાઉનમાંથી સપ્લાય થયેલી નશાકારક સીરપની 590 બોટલ અમદાવાદ પોલીસે વટામણ ચોકડી પાસેથી ઝડપી પાડી હતી. પોલીસે રીક્ષા ચાલક શખિલ શેખ અને પ્રતિક પંચાલને ઝડપી પાડી પૂછપરછ કરતા રાજુ નામના શખ્સે સીરપનો જથ્થો મોકલ્યો હોવાની વિગતો ખુલી હતી. જેથી અમદાવાદ પોલીસે વડોદરામાં દરોડા પાડ્યા હતા.

ઉપરોક્ત બનાવવા બાદ વડોદરા પોલીસ દોડતી થઈ હતી અને એસઓજીની ટીમે ગઈકાલે મોડી રાત્રે બાજવા રેલવે સ્ટેશન પાસે એક ગોડાઉનમાં દરોડો પાડી નશાકારક સીરપની રૂ સાડા છ લાખની કિંમતની 44000 બોટલનો જથ્થો કબજે કર્યો હતો. પોલીસે ગુનો નોંધી વધુ તપાસ હાથ ધરી છે.