નોંધણી કે પરવાના લીધા વગર ધમધમતાં સ્પાના મેનેજર સામે ગુનો દાખલ કરાયો

કુડાસણ વિસ્તારમાં તપાસ કરાઇ હતી

પોલીસ તપાસમાં જીએસટી નંબર પણ નહીં મેળવ્યાનું ખુલ્યું

ઇન્ફોસિટી પોલીસ મથકની ટીમ દ્વારા પેટ્રોલિંગ કરવા દરમિયાન કુડાસણ વિસ્તારમાં આવેલા પ્રતિક મોલમાં દુકાન નંબર ૫૦૪માં ટકસ સ્પા નામથી ચલાવવામાં આવતા વ્યવસાયના સ્થળે તપાસ કરવામાં આવી હતી. આ દરમિયાન પોલીસ દ્વારા સ્પાના મેનેજર હાલ રાયસણમાં ગુડા આવાસમાં રહેતા મુળ કલોલ તાલુકાના નાદરી ગામના યોગેશ નટવરભાઇ ન્યાયી પાસે સ્પા સંબંધે મંજુરીના ફરજિયાત લેવાના પરવાના અને પોલીસ સ્ટેશનમાં કરાવવાની થતી નોંધણી કરાવ્યાના કાગળો માંગવામાં આવ્યા હતાં.પરંતુ મેનેજર દ્વારા આવા કોઇ કાગળો નહીં હોવાનું જણાવામાં આવ્યુ હતું.

આ ઉપરાંત જીએસટી નંબર ધરાવવા બાબતે પણ કોઇ પ્રમાણપત્ર રજુ કરવામાં આવ્યુ ન હતું. જેના પગલે અધિક જિલ્લા મેજીસ્ટ્રેટના વિવિધ જાહેરનામાનો ભંગ કરવા બદલ ગુનો નોંધીને કાયદેસરની કાર્યવાહી કરવામાં આવી હતી.