આઈટી ક્ષેત્રમાં કર્મચારીઓની મોટેપાયે છટણીના અહેવાલને નાસ્કોમે ફગાવી દીધા

- ૨૦૨૫ સુધીમાં ૩૦ લાખ નવા રોજગાર ઊભા થવાનો દાવો

નવી દિલ્હી, તા. 19 મે, 2017, શુક્રવાર

ઈનફરમેશન ટેકનોલોજી (આઈટી) ક્ષેત્રમાં કર્મચારીઓની છટણીના તાજેતરના અહેવાલોને આઈટી ઉદ્યોગની સંસ્થા નાસ્કોમે ફગાવી દીધા છે અને જણાવ્યું હતું કે, ઉદ્યોગ આ વર્ષે દોઢ લાખ કર્મચારીઓની ભરતી કરશે, જો કે રોજગારને સુસંગત બનવા એન્જિનિયરોએ નવેસરથી તાલીમ લેવી પડશે.

દેશની અનેક મોટી આઈટી કંપનીઓ કર્મચારીઓની છટણી કરવાની વેતરણમાં હોવાના અહેવાલ પ્રકાશિત થયા હતા. મોટેપાયે છટણીના અહેવાલને અમે નકારી કાઢીએ છીએ. નાણાં વર્ષ ૨૦૧૭માં ૧.૭૦ લાખ કર્મચારીઓનો ઉમેરો થયો હતો જ્યારે ચોથા ત્રિમાસિક ગાળામાં દેશની ટોચની પાંચ આઈટી કંપનીઓનું ગ્રોસ હાયરિંગ ૫૦,૦૦૦થી વધુ રહ્યું હતું એમ નાસ્કોમના પ્રમુખ આર. ચન્દ્રશેખરે જણાવ્યું હતું.

ઓટોમેશનના વધેલા પ્રવાહ, આર્ટિફિસિઅલ ઇન્ટેલિજન્સના ઉપયોગ અને અમેરિકા દ્વારા રોજગારના નવા ધોરણોને કારણે આઈટી ક્ષેત્રમાં થઈ રહેલા ફેરબદલો ૧૦થી ૧૫ વર્ષના અનુભવ સાથેના મધ્યમ કદના કર્મચારીઓને અસર કરી શકે છે કારણ કે આ સ્તરના કર્મચારીઓ નવી તાલીમ લેવાનું ટાળે છે એમ ઉદ્યોગના સુત્રોએ જણાવ્યું હતું.

વિશ્વ આજે ઓટોમેશન, રોબોટિકસ, એનાલિટિકસ અને સાઈબર સિક્યુરિટીની નવી ટેકનોલોજીઓ તરફ વળી રહ્યું હોવાનું ધ્યાનમાં રાખતા કર્મચારીઓએ નવેસરથી તાલીમ લેવી પડશે નહીંતર તેઓ માટે સ્થાન નહી ંરહે એમ નાસ્કોમે જણાવ્યું હતું. નાસ્કોમે પોતાના સભ્યોનો સંપર્ક સાધ્યો હતો અને તેમણે નવી ભરતી કરવાનું ચાલુ રહેશે એવી ખાતરી પણ આપી હતી.

આ વર્ષમાં દોઢ લાખ નવી ભરતી થવાનો અંદાજ મળી રહ્યો છે. ટેક સ્ટાર્ટઅપ્સ, ઈ-કોમર્સ, ડિજિટલ ઈન્ડિયા અને ડિજિટલ પેમેન્ટસ જેવા ક્ષેત્રોમાં નવી તકો ઊભરી રહી છે. ૨૦૨૫ સુધીમાં ૩૦ લાખ નવા રોજગાર ઊભા થવાની ધારણાં છે.

આઈટી કંપનીઓએ કર્મચારીઓની વાર્ષિક કામગીરીની સમીક્ષા કરવાનું ચાલુ કર્યું છે અને આ સમીક્ષામાં નબળી કામગીરી સાથેના કર્મચારીઓને પાણીચું આપવામાં આવે છે. આ વર્ષે છટણીના મુદ્દે શા માટે આટલી બુમાબુમ થઈ રહી છે તે બાબતમાં નોસ્કોમ કોઈ સ્પષ્ટતા કરી શકી નથી. અમેરિકા, ઓસ્ટ્રેલિયા, ન્યુઝીલેન્ડ વગેરે દેશોમાં વર્ક પરમિટ સખત બનતા આ ક્ષેત્ર સામે ઊભા થયેલા પડકાર વચ્ચે આવી પડેલા આ અહેવાલે વધુ ગભરાટ ફેલાવી દીધો છે.

Keywords business,NASCOM,rejected,the,report,of,IT,field,sorting,